Zeınetaqy qorynan 200 mlrd teńge zańsyz sheshilgen - Qarjylyq monıtorıng agenttigi

ASTANA. KAZINFORM – Qarjylyq monıtorıng agenttigi prokýratýranyń úılestirýimen Atyraý oblysynda aýqymdy jedel-tergeý is-sharalaryn júrgizip jatyr. Bul týraly vedomstvonyń baspasóz qyzmeti málim etti.

Agenttiktiń aqparatyna sáıkes, «Biryńǵaı jınaqtaýshy zeınetaqy qorynan» qarajatty zańsyz sheshýge járdem kórsetken 5 qylmystyq toptyń áreketi áshkere boldy.

Olar eldiń ár óńirinde – Atyraý, Astana, Almaty, Shymkent, Aqtaý jáne ózge de qalalarda qaǵaz júzinde 30-dan astam stomatologııalyq klınıka ashyp, jalǵan qujattar rásimdegen. Alaıda bul medıtsına uıymdarynyń ǵımarattary da, jabdyqtary da, bilikti qyzmetkerleri de bolmaǵan. Klınıka basshylarynyń medıtsınalyq bilimi de joq ekeni anyqtaldy.

Jalǵan medıtsınalyq qujattardy rásimdegeni úshin kúdiktiler azamattardyń alǵan qarajatynan 10%-dan 20%-ǵa deıin syıaqy ustap otyrǵan. Al aınalymnan shyǵarylǵan qarajat kólemi 200 mlrd teńgeden asty.

Qylmystyq toptar aqshany qolma-qol aqshaǵa aınaldyrý úshin 226 «dropperdi» paıdalanǵan. Zeınetaqy salymshylarynyń esebinen kúdiktiler 600 mln teńgeden asatyn 15 qymbat avtokólik (Mercedes-Benz G-class, GLE, BMW X7, Porsche Taycan, Cadillac Escalade), sondaı-aq zergerlik buıymdar, kommertsııalyq nysandar, páterler men jer telimderin satyp alǵan.

Qazirgi ýaqytta 59 tintý júrgizildi, 10 adamǵa qatysty bultartpaý sharasy qoldanylýda. Qylmystyq jolmen alynǵan múlikti izdestirý jalǵasyp jatyr.

Tergeý barysynda tek zańsyz shema uıymdastyrýshylarynyń áreketterine quqyqtyq baǵa beriletini atap ótildi. Óziniń jınaqtalǵan zeınetaqy qarajatyn alǵan azamattar qylmystyq jaýapkershilikke tartylmaıdy.

Sonymen birge vedomstvo ustalǵandardyń qorǵaný quqyǵy buzyldy degen aqparatty joqqa shyǵardy.

«Barlyq protsessýaldyq áreketter qoldanystaǵy zańnamaǵa sáıkes júrgizilýde, kúdiktilerdiń advokattarymen baılanysy shektelmegen. QMA qyzmetkerleriniń is-áreketimen kelispegen jaǵdaıda advokattar men kúdiktiler sotqa nemese prokýratýraǵa shaǵymdana alady», – dep habarlady agenttik.

Agenttik BAQ ókilderin tekserilmegen málimetterdi jarııalamaýǵa, tek resmı aqparatqa súıenýge shaqyrdy.

Aıta keteıik, buǵan deıin Atyraýda zeınetaqy qarajatyn zańsyz aınaldyrý deregine qatysty aýqymdy operatsııa bastalǵany habarlanǵan bolatyn.