Zeınetaqy qorynan 1,5 trln teńgeni ınfraqurylymǵa baǵyttaý: Energetıka mınıstriniń pikiri

Energetıka mınıstri Almasadam Sátqalıev Biryńǵaı jınaqtaýshy zeınetaqy qorynan 1,5 trln teńgeni ınfraqurylymǵa ınvestıtsııalaý múmkindigine qatysty pikir bildirdi, dep habarlaıdy Kazinform.

«Búkil álemde energetıkaǵa ınvestıtsııa salý óte senimdi ınvestıtsııa retinde qarastyrylyp otyr. Atap aıtqanda, memleket baǵany retteı alady. Sondaı-aq bizde tólemderge qatysty tártip joǵary deńgeıde ekenin eskerý kerek. Elimizde jańartylatyn energııa kózderin damytýdyń aýqymdy baǵdarlamasy bar, sondyqtan osy baǵytta da tikeleı sheteldik ınvestıtsııa bolady. ıAǵnı, energetıka salasy ósip, bul sala damyp, ınvestıtsııalyq turǵyda tartymdy bolady. Bul – Úkimettiń basty mindetteriniń biri. Zeınetaqy qory bul qarjyny energetıkalyq jobalarǵa salýǵa sheshim qabyldasa, bul senimdi jobalar bolady dep oılaımyn», – dedi A. Sátqalıev Májiliste tilshiler suraǵyna jaýap bere otyryp.

Mınıstr eger BJZQ-dan qaryz bólingen jaǵdaıda Úkimet qarajattyń qaıtarylýy men tıimdiligin baqylaı alatynyn aıtty.

«Jalpy, energetıka salasyna ınvestıtsııa retinde qajet qarajat 5 trln teńgeden asyp túsedi. Búgin 1,5 trln teńge bólinýi yqtımal ekeni aıtylyp jatqanyn eskersek, bul qarajat qandaı da bir shuǵyl tártipte júzege asyrylatyn jobalarǵa baǵyttalýy múmkin dep sanaımyn. Men 1,5 trln teńge týraly aqparatty búgin ǵana estidim. Bul qadamdy energetıka salasyna baǵyttalǵan tıimdiligi joǵary ınvestıtsııa retinde qoldaımyn», – dedi mınıstr.

Buǵan deıin buqaralyq aqparat quraldarynda qazaqstandyqtardyń zeınetaqy jınaqtarynan 1,5 trıllıon teńge ınfraqurylymdyq jobalarǵa jumsalýy múmkin ekeni habarlanǵan edi.