Zeınetaqy qarjysyna emdelý: qashan qaıtadan ótinim berýge bolady

ASTANA. KAZINFORM – Qazaqstanda 12 qańtardan bastap birjolǵy zeınetaqy tólemi esebinen medıtsınalyq qyzmet alý úshin ótinim qabyldaý ýaqytsha toqtatyldy. Olardyń qashan qaıta qabyldanýy múmkin ekenin «Otbasy bank» túsindirdi.

Kazinform agenttigine bergen jaýabynda banktiń baspasóz qyzmeti zeınetaqy qarjysy esebinen emdelýge ótinim qabyldaý 6-9 aıǵa deıingi merzimge toqtatylýy josparlanyp otyrǵanyn aıtty.

– Bul ýaqytsha shara ekenin aıryqsha atap ótemiz. Qazaqstandyqtar birjolǵy zeınetaqy tólemderi esebinen emdelýge qaıta ótinim bere alarda mindetti túrde habarlaımyz. 2026 jylǵy 12 qańtarǵa deıin berilgen barlyq ótinimder ádettegi tártippen qaralady, – dep atap ótti bank ókilderi.

Qazirgi tańda banktiń radıohırýrgııa baǵyty boıynsha 7 666 ótinim qaralyp jatyr. Ýaqytsha shekteý dál osy em túrine ótinimderdiń kúrt kóbeıýine baılanysty engizilgen.

– Bul rásimder — aıasy tar ári joǵary mamandandyrylǵan sala bolǵandyqtan, standartty operatsııa jasaý múmkin emes nemese tym qaýipti bolǵan jaǵdaıda ǵana qoldanylady. Biz ótinimder sany az bolady dep kútken edik, biraq qatelestik. 2025 jylǵy qazanda radıohırýrgııa boıynsha 45 ótinim tústi. Qarashada – 113 ótinim. Al 1 jeltoqsannan 8 qańtarǵa deıin – 168 ótinim túsken, – dep túsindirdi bank.

Aıta keteıik, buǵan deıin bir aıdyń ishinde qazaqstandyqtar radıohırýrgııalyq em alýǵa 5,6 mlrd teńge kóleminde zeınetaqy tólemin alǵany habarlanǵan bolatyn.

Sondaı-aq ótken jyly azamattarǵa zeınetaqy jınaqtaryn plastıkalyq operatsııalarǵa paıdalanýǵa tyıym salynǵany belgili.

BJZQ zeınetaqy jınaǵynyń eń tómengi jetkiliktilik shegin 10 paıyz kóterdi.