Zeınetaqy qarajatyna alynǵan úıdi satýǵa bola ma — Otbasy bank jaýaby

ALMATY. KAZINFORM — Birjolǵy zeınetaqy tólemine alynǵan úıdi qaıta satýǵa shekteý qoıyla ma? Bul suraqqa Otbasy bank ókilderi jaýap berdi. 

Bank zeınetaqy tólemderine júrgizilgen operatsııalardy taldaý kezinde bir páterdiń birneshe ret ártúrli adamdarǵa qaıta satý derekteri anyqtalǵanyn habarlady. Ár satyp alýshy mámile úshin zeınetaqy qarajatyn paıdalanǵan. Mundaı áreketter zańdy buzbaıdy, alaıda zeınetaqy jınaqtarynyń maqsatsyz paıdalanylý qaýpin týdyrýy jáne jyljymaıtyn múlik naryǵyndaǵy baǵaǵa áser etýi múmkin.

Osy qaýipterdiń aldyn alý maqsatynda Otbasy bank Qazaqstan Respýblıkasynyń Ónerkásip jáne qurylys mınıstrligine birjolǵy zeınetaqy tólemderin paıdalaný erejelerine ózgerister engizý týraly usynys jasaǵan.

— Bank birjolǵy zeınetaqy tólemderi esebinen satyp alynǵan turǵyn úıdi tek 5 jyl ótken soń ǵana qaıta satýǵa ruqsat berýdi usynǵan. Alaıda bul usynys qoldaý tappady, sebebi zańda múlikke shekteý qandaı jaǵdaılarda qoıylatyny naqty aıqyndalǵan. Birjolǵy zeınetaqy tólemderi esebinen alynǵan turǵyn úı mundaı sanatqa kirmeıdi, — dep habarlady bankten.

Osylaısha qazaqstandyqtar burynǵydaı ózderiniń zeınetaqy jınaqtaryn turǵyn úı jaǵdaıyn jaqsartý úshin qoldanystaǵy tártippen paıdalana alady. Barlyq ótinim ádettegi rejımde qarastyrylyp jatyr.

2021 jyldan beri bank platformasy arqyly turǵyn úı jaǵdaıyn jaqsartýǵa shamamen 1,5 mıllıon ótinim baǵyttaǵan. Azamattar zeınetaqy qarajatynyń alýǵa bolatyn bóligin ıpotekany óteýge, bastapqy jarna tóleýge, turǵyn úı salýǵa, páterdi tikeleı satyp alýǵa paıdalanyp keledi.

Eske salaıyq, buǵan deıin zeınetaqy qarjysyn tis emdeý úshin jumsaýǵa shekteý qoıyldy.