Zeınetaqy aktıvterin basqarý: 2026 jyly ne ózgeredi
ASTANA. KAZINFORM – Zeınetaqymen qamtý máseleleri týraly qaýly jobasyna ózgerister men tolyqtyrýlar engizildi.
Qarjy naryǵyn retteý jáne damytý agenttigi ázirlegen qaýly jobasy «Ashyq NQA» portalynda jarııalandy. Atalǵan qujat 8 jeltoqsanǵa deıin qoǵamdyq talqylaýǵa usynylyp otyr.
Joba jeke ınvestıtsııalyq portfeldi basqarýshylarǵa berilgen zeınetaqy aktıvterin basqarýdy odan ári jetildirý maqsatynda daıyndalǵan.
- 2026 jylǵy 1 qańtardan bastap basqarýshy kompanııalardyń qyzmetin baǵalaý júıesi ortasha ólshengen nátıjeden qazaqstandyq qor naryǵy men álemdik qarjy alańdarynyń ındeksin qamtıtyn kompozıttik ındeksterge (benchmarkterge) negizdelgen baǵalaýǵa kóshedi, - delingen qujatta.
Osyǵan baılanysty Qarjy naryǵyn retteý jáne damytý agenttigi qaýlyǵa kelesi ózgerister men túzetýlerdi engizýdi usynady:
- salymshynyń zeınetaqy aktıvin belgili bir ınvestıtsııalyq portfelge berý tártibin jáne sharttaryn aıqyndaý;
- ınvestıtsııalyq portfeldi qalyptastyrý krıterıılerine baılanysty shetel valıýtasyna ınvestıtsııalaý lımıtin belgileý;
- basqarýshy kompanııalar ınvestıtsııalyq portfeldi tańdaǵan kezde BJZQ-nyń (Biryńǵaı jınaqtaýshy zeınetaqy qory) salymshylardy aqparattandyrý jónindegi mindetin belgileý;
- basqarýshy kompanııalardyń ınvestıtsııalyq portfeldi tańdaý týraly ýákiletti organdy habardar etý tártibi men merzimin aıqyndaý.
Aıta keteıik, Qazaqstanda 2026 jyly zeınetaqy 10 paıyzǵa ulǵaıady.