Zeınetaqy aktıvterin basqaratyn kompanııalarǵa qoıylatyn tabystylyq talaptary jeńildeıdi

ASTANA. KAZINFORM – Qarjy naryǵyn retteý jáne damytý agenttigi zeınetaqy aktıvteri kiristiliginiń eń tómengi deńgeıine qoıylatyn talaptardy qaıta qaraýǵa arnalǵan qaýly jobasyn ashyq talqylaýǵa shyǵardy. 

Qaýlyda ınvestıtsııalyq portfeldi basqaratyn kompanııalar zeınetaqy aktıvterinen quralǵan ınvestıtsııalyq portfeldiń bir jáne birneshe túrin qalyptastyratyny aıtylǵan.

Olar:

1) zeınetkerlikke shyǵý merzimine qaramastan salymshylardyń konservatıvtik portfeli;

2) zeınetkerlikke shyǵý merzimi úsh jyldan asatyn salymshylardyń qalypty portfeli;

3) zeınetke shyǵý merzimi on úsh jyldan asatyn salymshylardyń táýekeldi portfeli.

Bul qaýly basqarýshy kompanııalar alǵan zeınetaqy aktıvteriniń nomınaldy tabystylyǵy men eń tómengi tabystylyǵynyń arasyndaǵy teris aıyrmany óteýge baǵyttalǵan. Sonymen qatar qujat zeınetaqy aktıvterin ınvestıtsııalaıtyn qarjy quraldarynyń tizbesin keńeıtip, ınvestıtsııalaý lımıtterin tómendetýge arnalǵan. 

Buǵan deıin zeınetaqy jınaqtarynyń 2025 jylǵa arnalǵan eń tómengi jetkiliktilik shegi ózgerissiz qalatyny aıtylǵan.