Zeınet júıesin jańǵyrtýǵa baǵyttalǵan zań jobasynda birjaqty máseleler talqylanbaýy kerek - Q. Mámı

Bul týraly búgin Parlament Senatynyń jalpy otyrysynda palata spıkeri Qaırat Mámı málim etti. Eske salsaq, Senat jalpy otyrysta «Qazaqstan Respýblıkasynda zeınetaqymen qamsyzdandyrý týraly» zań jobasyn birinshi oqylymda maquldaǵan bolatyn.

«Zań jobasynyń qajetti, mańyzdy jaqtary bolǵanymen, negizgi ereksheligi elimizdegi áıel azamatshalarynyń zeınetkerlik jasyn kóterýge qatysty bolyp otyr. Qoǵamdaǵy, Parlamenttegi talqylaýlardyń barlyǵy derlik osy máselege aýysyp ketken tárizdi. Sondyqtan da, taǵy aıta ketetin jaıt, áıelderdiń zeınet jasyn kóterý qaralǵanymen, ony barynsha jumsaq etý sharalary da kózdelgen. Bul shara on jyl ishinde kezeń-kezeńimen júzege asatyny da qamtylyp otyr. Ekinshiden, mundaǵy basty ózgerister 1998 jylǵa deıingi eńbek ótili bolmaǵan azamatshalardy bolashaqta tolyqqandy zeınetaqymen kózdeıtinin zańdy ázirleýshi laýazymdy azamattar da aıtyp otyr. Osyny eskere otyryp, barlyq komıtetter zań jobasyn tujyrymdamalyq túrde qoldady, daýys berý nátıjesi de sony kórsetedi», - dedi spıker. Sonymen qatar, tóraǵa zań jobasynda zııandy jáne aýyr eńbek jaǵdaıynda jumys isteıtin áıelderdiń 50 jasta da zeınetkerlikke shyǵa alatynyn aıta kele, bundaı jaǵdaıda olardyń zeınetaqy jarnasyn erterek tolyqtyrý tetikteri de qaralǵanyn jetkizdi. Budan bólek, zeınetkerlik jasqa erterek shyǵa alatyn joldardy qalyń jurtshylyqqa kóbirek aıtý qajettiligine toqtalyp ótti.

«Biz zań jobasyn talqylaý barysynda tek qana qujattyń «aýyrlaý» tıetin tusyna aýyp ketken tárizdimiz. Sondyqtan da, senatorlar aldaǵy ekinshi oqylymda jan-jaqtylyqqa barynsha kóńil bólýi kerek. Osy máselelerdi barynsha qarastyrǵan lázim», - dedi Q. Mámı.

Zań jobasynda qamtylǵan basty máseleniń biri - áıelderdiń zeınetkerlik jasyn birizdendirý. Bul rette zań jobasynda qamtylǵandaı 2014 jyldyń 1 qańtarynan bastap zeınetkerlik jasty jyl saıyn 6 aıǵa ulǵaıta otyryp, birtindep 10 jyldyń ishinde júzege asyrý kózdeledi. Mundaı jaǵdaılarda zeınetkerlik jasty birdeılendirý áıelderdiń jınaqtaýshy zeınetaqy júıesine qatysý ótilin ulǵaıtý jáne zeınetaqy jınaqtarynyń kólemin arttyrý úshin usynylyp otyr. Bul tıisinshe, jınaqtaýshy zeınetaqy júıesinen alatyn zeınetaqynyń mólsherin arttyrýǵa septigin tıgizýi tıis.