Zertteýshiler men kongress ókilderi AQSh-ta qumar oıyndarǵa táýeldiliktiń ósýine alańdaýly

ASTANA. KAZINFORM – Zertteý qorytyndysy boıynsha sporttyq bás tigýler zańdastyrylǵan shtattardyń kóbeıýine baılanysty ınternette qumar oıyndarǵa táýeldilikten kómek suraıtyndar sany aıtarlyqtaı óskeni anyqtaldy, dep habarlaıdy NBC News. 

San-Dıegodaǵy Kalıfornııa ýnıversıteti jáne Brın Mavr kolledjiniń zertteýshileri JAMA Internal Medicine jýrnalynda zertteý qorytyndylary «býkmekerlik keńselerdiń densaýlyqqa úlken qaýip tóndiretinin kórsetip otyr» dep jazdy.

- Retteýshi qurylymdar men densaýlyq saqtaý uıymdarynyń qumar oıyndarǵa zııan keltirýmen baılanysty kúrdeli máselelerdi sheshýde yntymaqtastyq paradıgmasyn ózgertý qajet, - dep jazdy zertteýshiler.

Zertteý 2018 jyly Nevadanyń qumar oıyndar monopolııasyn buzǵan Joǵarǵy sot sheshiminen keıin zańdastyrylǵan sporttyq bás tigýler mıllıardtaǵan dollarlyq salaǵa aınalýyna baılanysty júrgizilgen.

Amerıkalyq qumar oıyndar qaýymdastyǵynyń málimetinshe, amerıkalyqtar bıylǵy jyly Sýperkýbokqa shamamen 1,4 mlrd dollar tikken, bul 2024 jylmen salystyrǵanda 1,25 mlrd dollarǵa kóp.

Qazirgi kezde 38 shtat pen Vashıngton (Kolýmbııa shtaty) býkmekerlik keńselerde nemese onlaın rejıminde sporttyq bás tigýdiń qandaı da bir túrine ruqsat berip, bul shtattarǵa júzdegen mıllıon dollar salyq túsiredi.

Zertteýshiler qumar oıyndarǵa táýeldilikke qatysty aı saıynǵy Google izdeýlerine taldaý jasady, mysaly, «oıynǵa táýeldilik týraly senim telefony» nemese «Men qumar oıynǵa táýeldimin» jáne Joǵarǵy Sot sheshiminen keıin búkil el boıynsha izdeýler 23 paıyzǵa artqanyn anyqtady.

Zertteýshiler ınternettegi izdeýlerdiń artýy densaýlyq saqtaý organdarynyń qumar oıyndarǵa táýeldilik máselesin baqylaýda ustaý qajettiligin kórsetedi degen qorytyndyǵa keldi.

- Qumar oıynmen baılanysty zııannyń kúsheıýine jáne onyń uzaq merzimdi saldaryna jol bermeý úshin shuǵyl áreket etý kerek, - deıdi zertteýshiler.

Osyǵan deıin 75 myńnan astam azamat ózin qumar oıyndarǵa qatysýǵa shektegeni týraly jazdyq.