Zertteýshiler mýzyka súıer qaýymǵa «muzdyqtar áýenin» usynady - baspasóz máslıhaty
ALMATY. 26 shilde. QazAqparat - Tuıyq sý muzdyqtarynyń áýenderi endi jańa óner týyndylaryn jasaýǵa paıdalanylmaq.
Bul týraly búgin Almatyda «Mýzyka áýenderi» jobasy aıasyndaǵy ekspedıtsııa qorytyndysyna arnalǵan baspasóz máslıhatynda aıtyldy.
«Shildeniń 21-25 kúnderi «Muzdyqtar áýeni» jobasy aıasynda Tuıyq sý muzdyqtarynda bolyp, sezimtaldyq deńgeıi joǵary jazý quraldary arqyly ondaǵy dybystardy jazyp aldyq. Geografııa ınstıtýtymen seriktesip júzege asyrylǵan bul jobany Gete ınstıtýty uıymdastyrdy. Onda derekti fılmder túsirýshi shveıtsarııalyq áıgili Krıstıan Fraı dybysty jazý barysyn jáne taýlar men muzdyqtardy beınetaspaǵa túsirdi. Onyń rejısserlik jáne operatorlyq jumystaryn endi taıaýarada nemistiń ZDF jáne Kulturzeit telearnalarynan kórýge bolady», - deıdi «Gete ınstıtýty Qazaqstan» dırektory Barbara Frenkel-Tonet.
Onyń aıtýynsha, bul ekspedıtsııa kezinde Frantsııanyń Arte radıosy Eýropanyń búkil tyńdarmandary úshin Tıan-Shan taýlarynyń dybysyn jazyp alǵan. Endi Ortalyq Azııanyń óner qaıratkerleri osy dybystardy qoldana otyryp áýender jazyp, basqa da óner týyndylaryn jasaýy úshin olarǵa tamyz aıynda ótetin festıvalde kórsetpek. Sondaı-aq sentıabrden bastap Qazaqstan, Qyrǵyzstan., Ózbekstan, Tájikstan elderinde, al kelesi jyly Eýropa memleketterinde arnaıy kontsertter ótedi dep josparlanýda.
