Zertteýshiler amerıkalyqtardyń ne sebepti kıno kórýden jerigenin bile almaı bas qatyrýda
ASTANA. QazAqparat - AQSh-ta 2000 jyldan beri tuńǵysh ret birde-bir amerıkalyq fılm kassalyq túsimniń jazǵy maýsymynda 300 mln. dollardan astam aqsha jınaı almady. Degenmen, sarapshylardyń aıtýynsha, bul maýsymda óte sapaly on shaqty fılm shyqqan bolatyn. Bul týraly ITAR-TASS habarlady.
Bul derekterdi keltirgen Cowen and Company konsaltıngtik kompanııasy amerıkadaǵy kınoteatrlarǵa kelýshilerdiń sany osy jazda 21 paıyzǵa azaıǵanyn da alǵa tartady. Osyǵan baılanysty kompanııanyń sarapshylary «eldiń negizgi kıno kórýshi aýdıtorııasy - jastarǵa ne boldy?» degen saýalǵa jaýap taba almaı bastaryn qatyrýda. «Ne olar kınodan jerip ketti, ne jazǵy ýaqytyn ótkizýdiń basqa amalyn tapty», deıdi sarapshylar.
«Biz shynymen de amerıkalyqtardyń bos ýaqytynda ne isteıtinin bilgimiz kelip bas aýyrtýdamyz. Olar bos ýaqytynda «Tvıtter» men «Feısbýkte» otyra ma, joq álde taza aýada serýendeı me?», - deıdi kompanııa ókili.
Múmkin osy jazda kórermendi qyzyqtyratyn fılmder shyǵarylǵan joq shyǵar degen boljamǵa olar úzildi-kesildi qarsy boldy. Cowen and Company ókilderiniń aıtýynsha, bıylǵy jazda keremet fılmder burynǵydan da kóp boldy, 23 kartınanyń kem degende 10-y jaǵary sapalylyǵymen kózge tústi. Olardyń ishinde 6-aýy sońǵy 14 jyldaǵy eń sapaly fılmder qataryna qosyldy», - dep atap ótti sarapshylar.
