Zertteýlerdi qarjylandyrýda ǵylym men bıznes tyǵyz baılanysta bolýy tıis - Aıbek Dádebaı
ASTANA. KAZINFORM – Sońǵy jyldary ǵylymdy qarjylandyrý eki eseden astam artty. Bul týraly Quryltaı Tóraǵasy Aıbek Dádebaı aıtty.
- Búgin Quryltaı Joǵary aýdıtorlyq palata Tóraǵasynyń ǵylymdy damytý salasyna júrgizilgen memlekettik aýdıttiń qorytyndylary týraly esebin qarady. Prezıdentimiz Qasym-Jomart Kemeluly Toqaev 28 qazandaǵy Qazaqstan halqyna Joldaýynda «Qazirgi zamannyń basty qýaty – bilim men ǵylymda, ozyq ınnovatsııalarda», – dep atap ótti. Bul elimizdiń qazirgi damý kezeńinde aıryqsha mańyzdy. Jańa Konstıtýtsııanyń eleýli jetistikteriniń biri – bilim, ǵylym jáne ınnovatsııa salalarynyń negizgi memlekettik basymdyqtar retinde arnaıy bekitilýi. Ǵylym endi qosalqy sala retinde emes, eldiń bolashaǵyna, ekonomıkalyq ósimi men básekege qabilettiligine tikeleı yqpal etetin strategııalyq resýrs retinde qarastyrylady. Muny naqty tsıfrlar da aıǵaqtaıdy. Sońǵy jyldary ǵylymdy qarjylandyrý eki eseden astam artty, - dedi Aıbek Dádebaı Quryltaıdyń jalpy otyrysynda.
Sonymen qatar ol ǵylymı zertteýler jáne ázirlemelermen shuǵyldanatyn mamandar sany úshten birge artqanyn aıtty. Ǵylymı qoǵamdastyqtyń jartysyna jýyǵyn jas ǵalymdar quraıdy.
- Degenmen, ǵylymnyń praktıkalyq qaıtarymy, nátıjeliligi men kommertsııalanýy memleket úshin ózekti kúıinde qalyp otyr. Aýdıt nátıjeleri men búgingi talqylaý da muny rastaıdy. Bul rette, ǵylym salasynda belgili bir progrestiń bar ekenin kórip otyrmyz. Ǵylym jáne joǵary bilim mınıstri búgin qabyldanyp jatqan sharalar týraly tolyq aqparat berdi. Memlekettik organdar Joǵary aýdıt palatasy bergen usynymdardy kezeń-kezeńimen iske asyra bastady. Atap aıtatyn bolsa, ǵylym salasynda 3 zań, 13 normatıvtik quqyqtyq akt qabyldandy. 2025 jyly aýdıtorlar eskertpeleriniń jartysynan astamy, sondaı-aq bıyl da usynymdar oryndalyp keledi, - dedi Quryltaı Tóraǵasy.
Osy oraıda ol búgingi talqylaýdy qorytyndylaı kele, birneshe mańyzdy jaıtqa toqtaldy. Birinshiden, ǵylymdy tıimdi basqarý – eldiń áleýmettik-ekonomıkalyq damýynyń negizgi faktory. Ǵylymı salany basqarý ǵylymı jobalardy súıemeldeýge qatysty barlyq protsesti – usynymdardy daıyndaýdan bastap túpkilikti nátıjelerdi engizýge deıin tsıfrlandyrýdy talap etedi.
- Ekinshiden, ǵylymı zertteýlerdi qarjylandyrý ǵylym men bıznestiń tyǵyz baılanysyna negizdelýge tıis. Ǵylymı-tehnıkalyq tapsyrmalardy tujyrymdaý ekonomıka men bıznestiń naqty suranystary men qajettilikterin eskerýi kerek. Osyǵan baılanysty, birlesken qyzmettiń naqty nátıjesine baǵyttalǵan yntalandyrýshy tetikterdi jetildirý qajet. Úshinshiden, ǵylymı qyzmettiń nátıjeliligine júrgizilgen monıtorıng onyń adamdardyń ómir súrý sapasyna tıgizetin áserin baǵalaýǵa tıis. Ǵylymı ázirlemeniń naqty ómirlik tsıklin jáne onyń ekonomıkaǵa tıgizetin naqty yqpalyn qadaǵalap otyrý mańyzdy. Atap aıtqanda, tehnologııalardy engizý, jańa jumys oryndaryn ashý, ónimderdi eksporttaý qamtylady. Al monıtorıngtiń basty krıterııi ǵylymı ázirlemelerdiń azamattarymyzdyń ómirin naqty qalaı jaqsartatyny bolýǵa tıis, - dep túsindirdi Aıbek Dádebaı.
Buǵan deıin habarlanǵandaı, Quryltaıdyń Tsıfrlandyrý, ınnovatsııalar jáne ǵylym komıtetiniń tóraǵasy, depýtat Darhan Ahmedıev ǵylymǵa qatysty Komıtettiń tujyrymdary men usynystaryna jarııalady.
