Zertteý ýnıversıtetteri bolashaqta ǵylymı elıtanyń shoǵyry bolmaq - H. Ýálıev
ASTANA. 27 qańtar. QazAqparat /Qanat Mámetqazyuly/ - Zertteý ýnıversıtetteri bolashaqta ǵylymı elıtanyń shoǵyry bolmaq. Búgin QR Parlamenti Cenatynyń jalpy otyrysynda «Ǵylym týraly» zań jobasyn talqylaý barysynda senator Husaıyn Ýálıev osylaı málim etti.
«Zańda qamtylǵan zertteý ýnıversıtetteri - bizdiń qoǵamymyz úshin jańa qubylys. Bolashaqta bul ýnıversıtetter ǵylymı elıtanyń negizgi shoǵyry bolmaq. Memleketimiz strategııalyq maqsatynda ındýstrııalyq ınnovatsııalyq sektordy damytýǵa basa mán berip keledi. Sondyqtan da, qabyldanǵan zań ǵylymdy, ǵylymı-tehnıkalyq qyzmetti qarjylandyrýdyń qurylymyn ári basymdyǵyn qaıta qaraýǵa baǵyttalyp otyr. Jumsalatyn shyǵystardyń teńgerimdiligi men tıimdiligi Ulttyq ǵylymı ortalyq arqyly tekserilip otyrady. Bunymen qosa, ǵalymdar men ǵylymı qyzmetkerlerdiń jalaqysyn qosymsha arttyrý múmkindigi paıda bolady», - dedi H. Ýálıev.
Onyń aıtýynsha, zań jobasy jeke ǵylymı sektordy qoldaýǵa da baǵyttalyp otyr. Álemdik tájirıbede bul salaǵa zertteý jáne praktıkalyq jumystardyń 70-90 paıyzy tıesili.
«Meniń usynysym bar. Shetelde aspırantýra men doktorantýranyń ishki bóliminde bilim alatyn jastardy oqytýdy qysqartpaý kerek», - dedi senator óz sózinde.
