Zertteý: qazirgi ýaqytta artyq salmaqtyń densaýlyqqa keltirer zııany az
ASTANA. QazAqparat - Danııa ǵalymdary qazirgi ýaqytta artyq salmaqtyń 40 jyl burynǵyǵa qaraǵanda adam densaýlyǵyna keltirer zalaly azaıǵan, dep sanaıdy. Olar 1970 jyldardan bergi Danııa turǵyndarynyń boıy, salmaǵy jáne ólim deńgeıin zerttep osyndaı tujyrym jasaǵan, dep habarlaıdy Bı-Bı-Sı agenttigi.
Ǵalymdardyń zertteýi Journal of the American Medical Association jýrnalynda jarııa etildi.
Olardyń oıynsha, qazirgi ýaqytta artyq salmaqtan ólý azaıǵan. Ol medıtsınanyń damýyna qatysty. Mysaly, qazir densaýlyq saqtaý salasy joǵary qysymǵa qatysty aýrýlardy jaqsy emdeıdi.
1970-shi jyldary semizdikke shaldyqqan adamnyń ólý yqtımaldylyǵy joǵary bolǵan.
1970-shi jyldardaǵy dene salmaǵynyń ońtaıly ındeksi, ıaǵnı salmaq pen boıdyń ara qatynasy, ólý qateri tómen adamdar úshin 23,7 boldy. Bul boıy 1,83 metr, salmaǵy 77 kılogramm er adamǵa nemese boıy 1,65 metr, salmaǵy 65 kılogramm áıel adamǵa qatysty.
1991-1994 jyldary ońtaıly ındeks 24,6-ǵa ósti. 2003-2013 jyldary - 27-ge jetti. Bul erlerdiń ońtaıly salmaǵy 14 kelige, áıelder úshin - toǵyz kelige artqan.
Alaıda dárigerler qazirge deıin eski saralaýdy paıdalanady, onda 25-ten joǵary ındeks artyq salmaqty, 30-dan joǵary - semizdikti bildiredi. Ǵalymdar olardy qaıta qaraý kerek dep sanaıdy. Tolyq adamdarǵa artyq salmaǵy úshin ýaıymdamaýǵa jáne aryqtaýǵa keńes beredi.
