Zertteý: Instagram jasóspirimder úshin áli de qaýip tóndiredi
ASTANA. KAZINFORM – Zertteý nátıjeleri Instagram-nyń jasóspirimderdi zııandy kontentten qorǵaýǵa arnalǵan quraldary olardyń óz-ózine qol jumsaý men ózin-ózi zaqymdaý týraly jazbalardy kórýine tosqaýyl bola almaı otyrǵanyn kórsetti, dep jazdy Azertadj.
Zertteýshiler Meta kompanııasyna tıesili bul áleýmettik jeli keıbir jaǵdaıda balalardy «eresekter tarapynan aıqyn seksýaldyq sıpattaǵy pikirler alǵan kontentti jarııalaýǵa ıtermelegenin» de málimdedi.
Balalardyń qaýipsizdigin qamtamasyz etýge baǵyttalǵan uıymdar men kıberqaýipsizdik salasyndaǵy zertteýshiler júrgizgen test nátıjesinde Instagram-daǵy jasóspirimderge arnalǵan 47 qaýipsizdik quralynyń 30-y «aıtarlyqtaı tıimsiz» nemese múlde qoldanystan shyqqan bolyp shyqty.
Meta kompanııasy zertteý nátıjelerimen kelispeıtinin bildirip, óziniń qaýipsizdik sharalary jasóspirimderdiń zııandy kontentti az kórýine yqpal etkenin alǵa tartty.
Kompanııa 2024 jyly Instagram jelisinde jasóspirimderge arnalǵan akkaýnttar engizip, bul jańalyq jastardy jaqsyraq qorǵaýǵa jáne ata-analarǵa olardyń áreketterin baqylaýǵa múmkindik beredi dep málimdegen bolatyn.
2025 jyly mundaı fýnktsııalar Facebook jáne Messenger platformalaryna da engizildi.
Jasóspirimderdiń qaýipsizdigine baǵyttalǵan osy zertteý Cybersecurity for Democracy amerıkalyq ǵylymı ortalyǵy men Molly Rose Foundation sııaqty balalar quqyǵyn qorǵaý uıymdarynyń tapsyrysy boıynsha Artýro Behar esimdi burynǵy Meta qyzmetkeriniń qatysýymen júrgizildi.
Zertteý avtorlary jalǵan jasóspirim akkaýnttaryn jasap, qaýipsizdik quraldaryn tekserý barysynda birqatar mańyzdy kemshilikterdi anyqtady. 47 quraldyń ishinen 30-y tıimsiz nemese múlde joıylǵan bolsa, taǵy toǵyz quraldyń tıimdiligi shekteýli bolǵan.
Ǵalymdardyń aıtýynsha, tek segiz qaýipsizdik quraly ǵana naqty jumys istegen. Alaıda bul kórsetkish Instagram-nyń jasóspirimderge arnalǵan kontent saıasatyna qaıshy keletin jazbalardyń áli de kórsetilip otyrǵanyn bildiredi. Atap aıtqanda, buǵan «qorlaýshy seksýaldyq sıpattaǵy áreketterdi» sıpattaıtyn posttar men óz-ózine qol jumsaý, ózin-ózi zaqymdaý nemese tamaqtaný buzylystaryn nasıhattaıtyn izdeý suranystarynyń avtomatty túrde tolyqtyrylýy jatady.
Aıta keteıik, Germanııada 16 jasqa deıingi balalarǵa TikTok pen Instagram-ǵa tyıym salý usynyldy.