Zertteý: elektrondy temeki júrek talmasy qaýpin arttyrady
ASTANA. KAZINFORM – Elektrondy temeki qoldaný mıokard ınfarkti men ınsýlt qaýpin arttyrýy múmkin. Mundaı qorytyndyǵa ǵalymdar júrgizgen zertteý nátıjesinde keldi, dep habarlaıdy Anadolý.
Zertteý aıasynda elektrondy temeki tutyný men júrek talmasy jáne ınsýlt qaýpi arasyndaǵy baılanys taldanǵan. Ǵalymdar buryn júrgizilgen 12 zertteýdiń derekterin qarastyrǵan. Infarkt qaýpin taldaýǵa 430 875 adam qatyssa, ınsýlt qaýpin baǵalaý barysynda 1 mıllıonnan astam adamnyń deregi qamtylǵan.
Nátıjeler elektrondy temeki qoldanatyn adamdarda ınfarkt qaýpi ony qoldanbaıtyndarǵa qaraǵanda 53 paıyzǵa joǵary ekenin kórsetken. Ásirese buryn kádimgi temeki shegip, keıin elektrondy temekige aýysqandarda júrek talmasy qaýpi aıqyn artatyny anyqtalǵan.
Sonymen qatar buryn temeki shekken, biraq elektrondy temekini paıdalanýdy jalǵastyryp júrgen adamdarda ınsýlt qaýpi múlde temeki shekpeıtindermen salystyrǵanda 73 paıyzǵa joǵary bolǵan.
Zertteýshiler alynǵan derekter elektrondy temekini «zııansyz balama» retinde qarastyrýǵa bolmaıtynyn dáleldeıtinin atap ótti. Uzaq jyldar boıy temeki shegý júrek-qan tamyrlary aýrýlarynyń, sonyń ishinde ıshemııalyq júrek aýrýy, gıpertonııa jáne ınsýlttiń negizgi qaýip faktorlarynyń biri bolyp sanalady.
Zertteý nátıjeleri BMC Public Health ǵylymı jýrnalynda jarııalanǵan.
Aıta keteıik, Tájikstan elektrondy temekige tyıym salady.