Zertteý: Respondentterdiń tórtten úshi saılaýǵa qatysýǵa nıetti
ASTANA. KAZINFORM – Daýys berýshilerdiń tórtten úshi Quryltaı depýtattarynyń saılaýyna qatysýǵa daıyn. Bul týraly Qazaqstan Respýblıkasy Prezıdenti janyndaǵy Qazaqstannyń strategııalyq zertteýler ınstıtýtynyń (QSZI) bas ǵylymı qyzmetkeri Aıgúl Zabırova aıtty.
Onyń aıtýynsha, QSZI shamamen bir aı buryn júrgizgen zertteý barysynda azamattarǵa «Eger saılaý aldaǵy jeksenbide ótse, daýys berýge barar ma edińiz?» degen suraq qoıylǵan.
– Respondentterdiń tórtten úshi saılaýǵa mindetti túrde qatysatynyn aıtty. Bul qazirgi saılaý naýqany barysynda saıası partııalardyń qandaı baǵdarlama, platforma men ıdeologııa usynatyny mańyzdy ekenin kórsetedi. Degenmen túpkilikti sheshimdi 23 tamyzda saılaý ýchaskesine keletin saılaýshy qabyldaıdy, – dedi Aıgúl Zabırova.
Ol sondaı-aq zertteý nátıjesi saılaýshynyń daýys berýge kelýine otbasynyń ál-aýqaty men bolashaqqa degen senimi de áser etetinin kórsetkenin aıtty.
-Eger otbasy sońǵy 12 aıdaǵy turmysyn jaqsy dep baǵalasa, mundaı adamdardyń saılaýǵa qatysý yqtımaldyǵy aıtarlyqtaı joǵary. Sondaı-aq aldaǵy bir jylda turmysym jaqsarady dep senetin azamattar da daýys berýge beıim keledi,-dedi ol.
Budan bólek ol bıyl Quryltaı saılaýynda alǵash ret daýys berý tolyqtaı partııalyq tizim boıynsha ótetinin atap ótti. Aıtýynsha, bul – qazaqstandyq saılaýshylar úshin jańa saıası jaǵdaı.
Eske salaıyq, búgin Qazaqstannyń strategııalyq zertteýler ınstıtýty (QSZI) alańynda saılaýaldy naýqandaǵy jasandy ıntellektiniń róli, tsıfrlyq tehnologııalardyń yqpaly jáne feık aqparatpen kúres máseleleri talqylanyp jatyr.
