Zertteý: Afrıka turǵyndary eýropalyqtardan eki ese kóp sadaqa beredi

ASTANA. KAZINFORM —  Afrıka — álemdegi eń jomart qurlyq. Bul tek qaıyrymdylyqqa qatysatyn adamdardyń sany jaǵynan ǵana emes, sonymen qatar tabystyń belgili bir bóligin qaıyrymdylyqqa bólý úlesi boıynsha da dáleldengen, dep habarlaıdy DW basylymy.

Al eýropalyqtar qaıyrymdylyqqa salystyrmaly túrde az qarajat bóledi. Sonymen qatar, olardyń kómek kórsetý maqsattary da ózgeshe.

Baı elderdiń turǵyndary qaıyrymdylyqqa muqtaj elderdiń halqyna qaraǵanda áldeqaıda az qarajat jumsaıdy. Bul — brıtandyq Charities Aid Foundation qory daıyndaǵan «Álemdik qaıyrymdylyq týraly eseptiń» málimetteri negizinde jasalǵan tujyrym.

Atalǵan esepte 2024 jyly jeke qaıyrymdylyqtyń jahandyq úrdisteri men adamdardy sadaqa berýge yntalandyratyn faktorlar zerttelgen. Jomarttyq deńgeıi tabysqa shaqqandaǵy qaıyrymdylyq kólemine negizdelgen. Zertteý álemniń 101 elinde 50 myńnan astam adam qatysqan saýalnama nátıjeleri boıynsha jasalǵan.

Álemdegi eń jomart qurlyq — Afrıka

Esepke sáıkes, byltyr dúnıe júzi boıynsha saýalnamaǵa qatysqandardyń 64%-y qaıyrymdylyqqa atsalysqan. Olardyń 38%-y muqtaj adamdarǵa nemese otbasylarǵa (dostary men týystarynan basqa) tikeleı qarjylaı kómek bergen. 36%-y qaıyrymdylyq uıymdaryna, al 25%-y shirkeý sekildi dinı mekemelerge aqsha bólgen.

Aımaqtyq turǵyda qarasaq, qaıyrymdylyqqa eń kóp qatysqan — Afrıka turǵyndary (72%). Odan keıin — Azııa (69%), Okeanııa (66%), Eýropa (59%) jáne Soltústik pen Ońtústik Amerıka (árqaısysy 56%).

Kim qansha bóligin qaıyrymdylyqqa jumsaıdy

Álem boıynsha orta eseppen adamdar óz tabysynyń 1,04%-yn qaıyrymdylyqqa jumsaıdy. Al tabysy tómen elderdegi turǵyndar bul kórsetkish boıynsha kósh bastap tur — olar 1,45% úlesin sadaqaǵa beredi. Al tabysy joǵary elderde bul kórsetkish bar bolǵany 0,70%.

Máselen, afrıkalyqtar orta eseppen tabysynyń 1,54%-yn qaıyrymdylyqqa jumsaıdy. Al eýropalyqtar — tek 0,64%. Tipti, keıbir damyǵan elderde bul kórsetkish odan da tómen. Mysaly:

• Frantsııa — 0,45%

• Germanııa — 0,39%

• Japonııa — 0,16%

Álemdegi eń jomart el — Nıgerııa. Bul Batys Afrıkadaǵy halyq sany eń kóp memlekette turǵyndar tabysynyń orta eseppen 2,83%-yn qaıyrymdylyqqa, dinı maqsattarǵa nemese muqtaj jandarǵa tikeleı kómektesýge arnaıdy.

Qaı jastaǵy adamdar kóbirek sadaqa beredi?

Jahandyq deńgeıde 35–44 jas aralyǵyndaǵy adamdar tabysynyń 1,18%-yn qaıyrymdylyqqa jumsasa, 65 jastan asqandar bul maqsatqa 0,83% ǵana bóledi. ıAǵnı, orta býyn ókilderi úlkenderge qaraǵanda shamamen 1,5 ese jomart.

Adamdardy qaıyrymdylyqqa ne ıtermeleıdi?

Saýalnamaǵa jaýap bergenderdiń aıtýynsha, qaıyrymdylyq jasaýǵa ıtermelegen negizgi sebepter:

• kómek bermese, ózderin kináli sezinýi múmkin degen ishki sezim;

• qoǵam aldyndaǵy jaýapkershilik;

• dinı senimder;

• jergilikti qaýymdastyqty qoldaý nıeti;

• ózgelerge úlgi bolýǵa degen umtylys.

Respondentterdiń 65%-y kómekti júrek qalaýymen jasaıtynyn aıtqan. 18%-y — jańalyqtardan kórgen máselelerge ún qatsa, 14%-y — áleýmettik jeli arqyly kómekke muqtaj jandardy tapqan kórinedi.

Kóbine adamdar jergilikti qaıyrymdylyq uıymdaryna senim bildiredi. Ulttyq jáne halyqaralyq qorlarǵa qaraǵanda, olarǵa kóbirek qarajat bóledi.

Balalar men jastarǵa kómektesý — jahandyq basymdyq

Álemniń barlyq óńirinde balalar men jastarǵa baǵyttalǵan qaıyrymdylyq bastamalar eń mańyzdy bolyp sanalady.

• Afrıkada — dinı uıymdarǵa qoldaý keń taralǵan.

• Azııada — kedeılikpen kúreske kóbirek nazar aýdarylady.

• Eýropada — gýmanıtarlyq kómek, densaýlyq saqtaý, balalar men jastarǵa qoldaý, kedeıler men janýarlarǵa kómektesý aldyńǵy qatarda.

• Ońtústik Amerıkada — bolashaq urpaqqa qoldaý kórsetý basty orynda.

• Soltústik Amerıkada — úısizdikpen kúres birinshi orynda tur.

• Okeanııada — densaýlyq saqtaý salasyndaǵy qaıyrymdylyq uıymdary eń tanymal.

Buǵan deıin Microsoft-tyń negizin qalaýshy Bıll Geıts aldaǵy jıyrma jyl ishinde óziniń baılyǵynyń 99 paıyzyn qaıyrymdylyqqa jumsaýǵa sheshim qabyldaǵanyn habarlady.