Zerthanalyq zertteýlerdiń sapasy men naqtylyǵyna aıryqsha nazar aýdarylady - QR DSM
ASTANA. 29 naýryz. QazAqparat - Búgin elordada Qazaqstan Respýblıkasy Densaýlyq saqtaý mınıstrliginiń uıymdastyrýymen «Medıtsınalyq zerthananyń zamanaýı menedjmenti - ózektiligi men bolashaǵy» atty respýblıkalyq ǵylymı-tájirıbelik forým ótti.
«Qazaqstanda jasalatyn zerthanalyq-dıagnostıkalyq zertteýlerdiń sapasyn jaqsartý úshin syrttaı baǵalaý boıynsha ulttyq júıe qurý josparlanýda. Bul óz kezeginde elimizde dıagnostıkalyq qyzmetterdiń qoljetimdili men sapasyn arttyrýǵa múmkindik beredi»,-deıdi QR DSM medıtsınalyq kómekti uıymdastyrý departamenti dırektorynyń orynbasary Gúlnár Ótepbergenova.
Forým jumysyna Qazaqstan Respýblıkasy Densaýlyq saqtaý mınıstrliginiń ókilderi, Reseıdiń tájirıbelik zerthanalyq medıtsınasynyń belgili mamandary, medıtsınalyq zerthanalardy akkredıtteý salasynyń mamandary, oblystyq, Astana jáne Almaty qalalarynyń Densaýlyq saqtaý basqarmalarynyń basshylary qatysty.
Zerthanalyq qyzmetti jetildirý Qazaqstan Respýblıkasynyń densaýlyq saqtaý salasyn damytýdyń 2011-2015 jyldarǵa arnalǵan «Salamatty Qazaqstan» memelekettik baǵdarlamasynyń bir baǵyty bolyp tabylady.
Osyǵan oraı forým sheńberinde medıtsınalyq zerthana qyzmetin uıymdastyrý, zerthananyń halyqaralyq standarttarǵa sáıkestigin akkredıtteý, medıtsınalyq zerthananyń operatsııalyq úrdisterin standarttaý, medıtsınalyq zerthanalar qyzmetiniń ekonomıkalyq aspektileri, klınıkalyq-dıagnostıkalyq zerthana qyzmetin aqparattandyrý, medıtsınalyq zerthana sapasyn basqarý, sondaı-aq zerthanalyq zertteýlerdi ortalyqtandyrý boıynsha ózekti máseleler talqylandy.
Emdeý kezinde naýqastarǵa kóptegen dıagnostıkalyq zertteýlerden ótý qajet, olardyń ishinde mańyzdy oryn alatyny - klınıkalyq zerthanalyq zertteýler. Dúnıejúzilik densaýlyq saqtaý uıymynyń málimetteri boıynsha zerthanalyq zertteýler úlesi medıtsınalyq uıymdardyń naýqasqa júrgiziletin barlyq zertteýlerdiń 75-80% quraıdy.
Zerthanalyq zertteýler dıagnozdy anyqtaý men rastaý, aýrýdy dıfferentsıaldy dıagnostıkalaý, boljam jasaý men emdeý ádistemesin negizdeý úshin taǵaıyndalady.
Osyǵan oraı qazirgi jaǵdaıda zerthanalyq zertteýlerdiń sapasy men naqtylyǵyna úlken nazar aýdarylady. Zertteý nátıjeleriniń sapasyn jaqsartý men olardyń óndirisi kezinde shyǵyndardy tómendetýdiń negizgi joly - óndiris úrdisin basqarý.
Tájirıbe almasý, medıtsınalyq zerthana menedjmenti máselelerin talqylaý zerthana qyzmetin jetildirýge múmkindik beredi.
