Zergerlik ónimderdiń eksporty 7,3 esege ósti
ASTANA. KAZINFORM - Qazaqstanda zergerlik ónerkásip memleket qoldaýynyń arqasynda qarqyndy damyp keledi, dep habarlaıdy QR Ónerkásip jáne qurylys mınstrliginiń baspasóz qyzmeti.
Naryq dınamıkasy
Mysaly, 2025 jyldyń alǵashqy 10 aıynda zergerlik buıymdar naryǵynyń óndiris kólemi 2024 jyldyń sáıkes kezeńimen salystyrǵanda 41,3%-ǵa ósip, 4,1 mln dollarǵa jetti. Import 39,6%-ǵa ósip, 174,7 mln dollarǵa jetti. Al eksport 7,3 esege ósip, 54,5 mln dollarǵa jetti. Іshki tutyný 3,2%-ǵa ósip, 124,3 mln dollarǵa jetti.
Salany memlekettik qoldaý sharalary
Bul 2016 jyldan bastap elimizde zergerlik kompanııalarǵa jylyna 300 kg-ǵa deıin altyn satýǵa kvota belgilengendigimen baılanysty. Tazartylǵan altyn basymdyqpen Qazaqstan Ulttyq bankine satylady. 2025 jyly bul kórsetkish shamamen 74 tonnany qurady. Taý-Ken Altyn bul mehanızmdi túıirshiktelgen tazartylǵan altyndy satý arqyly da júzege asyrady.
Odan bólek, 2023 jyldyń qańtar aıynyń basynan bastap Qazaqstanda jumys isteıtin zergerlik buıym óndirýshileriniń kvota boıynsha altyn satyp alýyna qosymsha qun salyǵy (QQS) salynbady. Osy optsııany paıdalana otyryp, zergerlik buıym óndirýshileri 2025 jyly QQS-syz 38 kg altyn satyp aldy, bul 2024 jylǵy 34,3 kg-men salystyrǵanda 10,7%-ǵa artyq.
«Astana AEA-nyń» basym qyzmet túrlerine baǵaly metaldar men tastardan jasalǵan zergerlik buıymdardy óndirý kiredi.
Otandyq óndirýshiler úshin kúmis zergerlik buıymdarǵa arnalǵan synaq kameralarynda belgilerdi qoıý talaby da alynyp tastaldy.
Qazaqstanda barlyǵy 4 542 zergerlik buıymdarmen saýda jasaıtyndar tirkelgen, olardyń 445-i óndirýshiler.
-Qazaqstandaǵy zergerlik buıymdar saýdasy «Baǵaly metaldar men baǵaly tastar týraly» Zańmen retteletinin eske salǵan jón,-delingen habarlamada.
Osyǵan deıin zergerlik buıym satý talaptary kúsheıtilgeni týraly jazdyq.