Zergerlik buıymnyń synama tańbasy bolmasa ne isteý kerek

ALMATY. KAZINFORM - Almaty qalasy tehnıkalyq retteý jáne metrologııa komıteti departamentiniń basshysy Dáýren Sársenbaev zergerlik buıymdarǵa qoıylatyn talaptardy atady.

Onyń aıtýynsha, departament tehnıkalyq reglamentter talaptarynyń saqtalýyna qatysty ártúrli salada memlekettik baqylaý men qadaǵalaý júrgizedi. Tekserý qurylys materıaldaryn, halyq tutynatyn taýarlardy, ónerkásiptik ónimderdi, avtokólik quraldaryn, munaı ónimderin, motor maılary, mobıldi qurylǵylardy jáne basqa da baǵyttardy qamtıdy.

Onyń ishinde baǵaly metaldar men asyl tastardan jasalǵan zergerlik buıymdardyń aınalymyn baqylaýǵa erekshe nazar aýdarylady. Dáýren Sársenbaev baǵaly metaldardan jasalǵan zergerlik buıymdarda synama tańbasy bolýy mindetti ekenin atap ótti.

- Eger tutynýshy synama tańbasy joq altyn buıym satyp alyp, shaǵym túsirse, departament jospardan tys tekserý bastaıdy. Synama tańbasy joq buıymdy satqany rastalǵan jaǵdaıda, quqyq buzýshy ákimshilik jaýapqa tartylady. Bıznes sanatyna baılanysty 50-den 150 aılyq eseptik kórsetkishke deıin aıyppul salynady. Satýshy zańsyzdyqty joıyp, buıymǵa saraptama júrgizýge mindetti, – dep túsindirdi Dáýren Sársenbaev.

Aıtýynsha, saraptama júrgizilgennen keıin buıym resmı túrde synamany rastaıtyn barys basy beınesindegi synama tańbasyn alýy tıis, sodan keıin ǵana qaıtadan satylymǵa jiberiledi.

Eske salaıyq, zergerlik ónimderdiń eksporty 7,3 ese ósti.