Zergerlik óner tarıhı sananyń jańǵyrýyna múmkindik beredi - sheber

ShYMKENT. QazAqparat - Ońtústik Qazaqstan oblysynda «Shabyt kúni» atalyp ótilýde. 1 naýryz - Alǵys aıtý kúni merekesi qarsańynda bastalǵan onkúndiktiń úshinshi kúni osyndaı ataýmen jalǵasyn tapty, dep habarlaıdy QazAqparat tilshisi.

Bul kúni oblystyń  barlyq qala-aýdan ortalyqtarynda «Yntymaǵy jarasqan Qazaqstan!» taqyrybynda óńirdegi shyǵarmashyl daryn ıeleriniń qolóner buıymdary men shyǵarmashylyq óner týyndylary kórmeleri ótip jatyr.

Sonymen qatar, jalpy orta mektepter men kolledjderde «Yntymaǵy jarasqan Qazaqstan!» taqyrybynda shyǵarmashylyq baıqaýlar uıymdastyrylýda.

 

Al, oblystyq  «Qazaqstan halqy Assambleıasy» ǵımaratynda  ótken  qolóner buıymdary kórmesine óńirdegi túrli etnos ókilderi qatysty. Іs-sharanyń ashylýynda oblystyq «Qoǵamdyq kelisim» mekemesiniń basshysy Erbol Baıqonaqov 20 aqpannan bastalyp, 1 naýryzǵa deıin jalǵasatyn merekelik is-sharalardyń  mán-mazmunyna toqtaldy.

Jıynda sóz alǵan oblystyq ózbek etnomádenı birlestiginiń múshesi, qolóner sheberi Ikramjan Rafıkov 15 jyldan beri qazaq halqynyń zergerlik buıymdaryn jasaýmen ári nasıhattaýmen aınalysyp kele jatqanyn aıtty.

 

«Qazaq halqynyń erte zamannan bastaý alǵan zergerlik óneri halyq ómirimen, tarıhymen, sharýashylyǵymen tyǵyz baılanysta damyp keledi. Ár týyndynyń astarynda tereń mán-maǵyna bar. Osy dúnıeler arqyly bolashaq urpaq óziniń tek-tanymyn bilip, tarıhı sanasynyń jańǵyrýyna múmkindik alady», - deıdi sheber Rafıkov.

Aıta ketý kerek,  erteń «Kórshige izet»  kúni aıasynda óńirde aýyl azamattaryn jaqyndastyrý,  kórshiler arasyndaǵy baılanysty bekemdeý baǵytynda túrli is-sharalar uıymdastyrylmaqshy.