Zergerlik dúkendi tonap ketken qostanaılyqtar úıqamaqqa alyndy
QOSTANAI. QazAqparat - Rýdnyıda zergerlik dúkendi tonaǵandar ustaldy, dep habarlaıdy QazAqparat Rýdnyı qalalyq ІІB bastyǵy Álim Bajyqbaevqa silteme jasap.
Álim Bajyqbaev aıtqandaı, Rýdnyı qalasynyń úsh turǵyny zergerlik dúkendi tonaý úshin jarty jyl boıy daıyndalǵan. Buzaqylardyń bireýi buryn sol dúkende jumys istegen.
«Aldymen, olar kilttiń kóshirmesin jasaǵan. Barlyǵy 300 zergerlik buıym tonaldy. Shyǵyn kólemi 26 mln teńgeni qurady. Buıymdardy Astana jáne Almaty qalalaryndaǵy lombardtarǵa ótkizgen. Keıbir zattardy jerge kómip tastaǵan. Qazirgi ýaqytta urylardyń bári ustaldy. Zattaı derekter óndirilip jatyr», - dedi Á.Bajyqbaev.
Dúken urylary sot sheshimi shyqqansha úıqamaqta bolady. ІІB bastyǵynyń sózinshe, zergerlik dúkende beınekameralar men dabyl júıesi ornatylmaǵan. Sol sebepti saýda orny basshysyna da tıisti sharalar qoldanylady.
