Zergerlik dúkendi tonaǵan azamat traktormen qashty
ASTANA. QazAqparat - Kanadalyq Blekfalds qalashyǵynda krımınaldyq kúlkili oqıǵa oryn aldy.
Turǵylyqty jeri joq 25 jasar Djessı Seska jergilikti zergerlik dúkendi tonap, sonymen qatar ondaǵy myltyqty da qosa alyp ketken. Budan keıin ol jergilikti turǵynnyń qarda júrgish kóligin aıdap ketip, fermerlik alqaptardyń arasynda jasyrynýǵa árettengen.
Alaıda bul kólik qarǵa maltyǵyp qalǵannan soń, Seska taıaý mańda ornalasqan fermadan jol talǵamaıtyn avtomobıldi minip ketedi. Biraq, bul kólik te kópke uzamaı batyp qalǵan kórinedi.
Seska qalyń qardy keship, kelesi fermaǵa jetkennen keıin fermerlik traktormen qashýǵa kirisedi. 45 mınýtqa sozylǵan qýǵynnan keıin ony quryqtaýǵa múmkin boldy.
Belgili bolǵandaı, Djessı Seska traktordy basqarýdyń mán-jaıyn durys bilmeýi saldarynan qolǵa túsken. Bul tehnıkany minip keter aldynda traktordyń júk tıegish qurylǵysy joǵary qaraı kóterilip turǵan eken jáne ol ony tómen túsire almaǵan. Nátıjesinde, oıly-shuńqyrly jerlerdiń birinde traktor tepe-teńdikti joǵaltyp, aýdarylǵan.
Qaraqshylyǵy men úsh kólikti aıdap ketkeni úshin oǵan tıisti baptar boıynsha aıyp taǵyldy.
