Zerger jasaǵan XVIII ǵasyrdyń qarý-jaraqtary jurt kóńilin jaýlap aldy
ASTANA. QazAqparat - Pavlodar qalasynyń G.N.Potanın atyndaǵy oblystyq tarıhı-ólketaný mýzeıinde belgili zerger Berik Álibaıdyń «Sheberlik pen shabyt» atty kórmesi ashyldy, dep habarlaıdy pavlodarnews.kz.
Sharaǵa oblystyq mádenıet, arhıvter jáne qujattama basqarmasynyń basshysy Ardaq Raıymbekov, sýretshiler, qolónershiler, zergerler, kórkem óner kolledjiniń stýdentteri qatysty. Ardaq Raıymbekov shet elderde mundaı shara uıymdastyryp júrgen zergerdiń Qazaqstandaǵy kórmesin Ertis óńirinen bastap jatqanyna rızalyǵyn bildirip, basqarmanyń atynan alǵys hat tabystady.
Tarıhı-ólketaný mýzeıi etnografııa bóliminiń jetekshisi Sholpan Abekesh Qazaqstannyń eńbek sińirgen qaıratkerin arnaıy shaqyrǵandaryn atap ótti.
«Kórme Astana qalasynyń 20 jyldyq mereıtoıyna arnalǵan», - dedi Sholpan Abekesh. - Berik Álibaı halyq arasynda tanymal. Týyndylary kóptiń kóńilinen shyǵyp júr. Sondyqtan biz arnaıy shaqyryp otyrmyz. Óziniń avtorlyq týyndylary men jeke toptamasyndaǵy buıymdardy da ákelip otyr. Atadan mura bolyp kele jatqan XVIII ǵasyrdyń qarý-jaraqtary men óz qolymen jasaǵan saqına, bilezik, túıme syndy asyl tastarmen bezendirilgen zattar bar. Kórmege 400-ge jýyq buıym qoıyldy. Sondaı-aq keı zattardy satyp alýǵa da bolady».
Belgili zerger Berik Álibaı sharanyń Pavlodar oblysynyń 80 jyldyǵyna arnalatynyn jetkizdi. - Qurmettep shaqyryp, kórme uıymdastyrýshylarǵa alǵysymdy bildiremin, - dedi Berik Álibaı. - Kelgen kópshiliktiń qolynan ózimniń buıymdarymdy kórip qýanyp turmyn. Tamashalap kelip jatqandarǵa rahmetimdi aıtamyn. Halyq kórip, baǵasyn bere jatar».
Aıta keteıik, Berik Álibaı Qazaqstan dızaınerler jáne sýretshiler odaǵynyń múshesi, QR eńbek sińirgen qaıratkeri, halyqaralyq Karl Faberje «Qurmet» ordeniniń ıegeri, «Musylman áleminiń qurmetti zergeri» ordenimen marapattalǵan. Onyń avtorlyq jumystary «Táýelsizdik saraıyndaǵy» etnografııa jáne qoldanbaly óner galereıasynda, QR Tuńǵysh Prezıdentiniń Mýzeıi qorlarynda, jeke kollektsıonerler men sheteldik galereıalarda saqtaýly.
