Zerendide jylý qubyry qaıta jaryldy: Mektepte sabaq toqtatyldy
KÓKShETAÝ. QazAqparat - Aqmola oblysynyń Zerendi aýylynda jylý qubyry ekinshi ret jarylyp, 50 turǵyn úı men 1 mektep jylýsyz qaldy. Oqýshylardyń sabaǵy ýaqytsha toqtatyldy, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Eske salaıyq, 17 qańtar kúni keshki saǵat 20:00 shamasynda Zerendi aýylynda jylýmen qamtamasyz etý ortalyq júıesinen aqaý shyǵyp, ystyq sý syrtqa atqylaǵan bolatyn. Bir turǵyn úı men dəmhana ǵımaraty jylýsyz qaldy. Apat ornynda aýdan ákimi Mereke Mustafın bolyp, qalpyna keltirý jumystaryn baqylaýǵa alǵan edi.
Al búgin, 18 qańtar kúni tańǵy saǵat 05:30 shamasynda Zerendi aýylynda jylý qubyry qaıta jaryldy (50 mm dıametr). Apat jylý júıesine ystyq sý jiberý kezinde oryn alǵan. Qubyrdan kóp sý syrtqa aǵyp, jekemenshik 50 turǵyn úı men 1 mektep jylýsyz qaldy. Oryn alǵan apatqa baılanysty №1 Zerendi orta mektebinde sabaq ýaqytsha toqtatyldy.
Ákimdikten habarlanǵandaı, qazirgi kezde, tótenshe jaǵdaıdyń zardabyn joıý jumystary aıaqtalyp, qubyrǵa ystyq sý qaıtadan jiberilýde. Mamandardyń aıtýynsha, jarylǵan qubyrdan 700 tekshe metr sý dalaǵa aqqan. Qubyrǵa ystyq sý jiberý jumystary birneshe saǵattań soń aıaqtalady.
