Zerendide jemqorlyqpen baılanysty jaýapkershilik máselesi qozǵaldy

ZERENDІ. QazAqparat - Memlekettik qyzmetshiler arasynda sybaılas jemqorlyq quqyq buzýshylyqtyń aldyn alý jáne eskertý maqsatynda QR Sybaılas jemqorlyqqa qarsy is-qımyl agenttiginiń Aqmola oblysy boıynsha departamenti óńirlik Aqparattyq-aǵartýshylyq shtabymen birlesip Zerendi aýdany ákiminiń apparatynda semınar-keńes ótkizdi.

Bul týraly QazAqparat agenttiktiń Aqmola oblysy boıynsha departamentiniń baspasóz qyzmetine silteme jasap.

Semınar barysynda Departamenttiń aldyn alý jáne parasattylyq basqarmasynyń basshysy Baqytjan Ámirhanov sóz sóılep, sybaılas jemqorlyqqa qarsy kúres qyzmetiniń basym baǵyttary týraly aıtyp, qatysýshylardy QR Sybaılas jemqorlyqqa qarsy zańnamasyna jańa engizilgen túzetýlerden habardar etti.

«Osy jyly Shtabtyń jumysy Zerendi aýdanynan bastalǵany kezdeısoq emes. Ózderińizge belgili, ótken jyly para alǵany úshin Zerendi aýdanynyń burynǵy ákimi men onyń orynbasarlary sottaldy. Sondyqtan, birinshi basshylardyń baǵynyshty qyzmetkerlerdiń sybaılas jemqorlyq quqyq buzýshylyqtary úshin derbes jaýapkershiligine, sondaı - aq ujymda aldyn alý sharalaryn durys qoldanbaǵany úshin jaýapkershiligine qatysty jańashyldyqtar týraly másele osy aýdanda erekshe ózekti bolyp otyr», - dep atap ótti Baqytjan Ámirhanov.

Qoǵamda sybaılas jemqorlyqqa tózbeýshilik pen parasattylyqty qalyptastyrý týraly oblystyq Aqparattyq-aǵartýshylyq shtab múshesi, QR Prezıdenti janyndaǵy Memlekettik basqarý akademııasy Aqmola oblysy boıynsha fılıalynyń dırektory Bella Gazdıeva sóz sóıledi.

«Qazirgi ýaqytta memleket qoǵammen ózara is-qımyldyń, ákimshilik kedergilerdi qysqartý men jumys sapasyn arttyrýdyń jańa joldaryn ashady. Memlekettik apparat pen qoǵamnyń tyǵyz yntymaqtastyǵyn qurý sybaılas jemqorlyq kórinisteri joq kúshti memleket qurýdyń negizgi faktory bolyp tabylady. Bul oraıda, sybaılas jemqorlyqqa qarsy is-qımyl salasyndaǵy quqyqtyq, áleýmettik jáne mádenı aspektiler týraly azamattardy aqparattandyrý jáne aǵartý boıynsha kezdesýler ótkizý qajettiligi týdy. Ol úshin respýblıkalyq jáne aımaqtyq deńgeıde Aqparattyq-aǵartýshylyq shtab quryldy», - dedi Bella Gazdıeva.

Sondaı-aq spıkerler árbir memlekettik qyzmetshi óz oıyn, minez-qulqy men is-áreketteri úshin jaýapty bolýy, eń aldymen óz aldynda adal jáne laıyqty bolýy tıis ekenin atap ótti.

Sonymen qatar, kezdesýge qatysýshylarǵa Departamenttiń «Bizge aqsha emes, áke kerek, bizge aqsha emes, ana kerek!» atty paraqorlyqtyń aldyn alýǵa baǵyttalǵan beınematerıaly kórsetildi.

Keńes sońynda Zerendi aýdanynyń ákimi Baýyrjan Ǵaısa memlekettik qyzmetkerler arasynda sybaılas jemqorlyqtyń aldyn alý boıynsha barlyq qajetti sharalar qabyldanatynyn, sondaı-aq Shtabtyń iske asyrylyp jatqan bastamalaryn qoldaıtynyn baıandady.