Zerendide Tımýr Segizbaevty eske alýǵa arnalǵan halyqaralyq týrnır ótti
KÓKShETAÝ. QazAqparat - Aqmola oblysynyń Zerendi aýdanynda dańqty sportshy Tımýr Segizbaevty eske alýǵa arnalǵan fýtboldan 2-shi halyqaralyq týrnır ótti, dep habarlaıdy QazAqparat tilshisi.
Eki kúnge sozylǵan týrnırdiń jabylýy rásiminde aımaq basshysy Ermek Marjyqpaev jarysqa qatysýshylardy quttyqtap, esimi respýblıkamyzǵa tanymal Tımýr Segizbaevty eske alýǵa arnalǵan týrnırdiń óńirde jas sport sańlaqtaryn tábıeleýde mańyzy zor ekenin atap ótti. Ol Aqmola oblysynda sportty damytýda úlken jumystar atqaralyp jatqanyna toqtaldy. Mamandandyrylǵan mektepterde 17 myńnan astam bala tárbıelenýde. Alty aýdanda qazirgi zamanǵy dene shynyqtyrý jáne sport keshenderi ashyldy. Astrahan aýdanynda dene shynyqtyrý jáne sport kesheniniń qurylysy aıaqtalsa, Ereımentaý jáne Birjan sal aýdandarynda bastaldy.
«Bizdiń oblys kóptegen halyqaralyq, respýblıkalyq jarystardy ótkizýdiń ortalyǵyna aınaldy. Sporttaǵy basty baǵyttardyń biri, jasósipirimder men balalardyń arasynda qyzyǵýshylyq artyp kele jatqan fýtboldy damytýǵa erekshe kóńil bólinýde. Osy oraıda, fýtboldy damytýda óńirde qatarynan 20 jyl ótkizilip kele jatqan Tımýr Segizbaev atyndaǵy halyqaralyq týrnırdiń úlesi zor. Onyń esimi qazaqstandyq fýtbol tarıhyna altyn árippen jazylǵan», dep atap ótti Ermek Marjyqpaev.
Ákim jas bylǵary dop sheberlerine Qazaqstan quramasy sapynda 19 jyl óner kórsetken dańqty sportshy sııaqty jetistikterge jetýlerine tilektestigin bildirdi.
«Búgingi jarysqa Tımýr Sanjarulynyń shákirti, Almatynyń «Qaırat» komandasynda 300-den astam oıyn ótkizgen Qazaqstan fýtbolynyń maqtanyshy Seıildá Baıshaqovtyń qatysýy qýanytyp otyr», deı kele, aımaq basshysy oǵan estelik syılyq tapsyrdy.
Týrnırge Zerendi aýdany men Omby, Tashkent, Astana, Kókshetaý, Ekibastuz, Qaraǵandy, Aqtóbe jáne Taraz qalalarynan kelgen 2005, 2006 jáne 2007 jyly týǵan jasóspirimderden quralǵan 20-dan astam komanda qatysyp, baq synady. 2007 jylǵy jasóspirimder arasynda chempıondyq ataqqa 8 komanda talassa, 2005-2006 jylǵy jasóspirimderden quralǵan 12 komanda eki topqa bólinip, saıysqa tústi. 2005-2006 jylǵylar arasynda aqtóbelikter birinshi oryn enshilese, 2007 jylǵylar arasynda Kókshetaýdyń «Energetık» komandasy jeńimpaz atandy.
