Zerendide orman órti sóndirildi

KÓKShETAÝ. QazAqparat - Aqmola oblysynyń Zerendi aýdanynda orman órti sóndirildi, dep habarlaıdy QazAqparat tilshisi oblys ákimdiginiń baspasóz qyzmetine silteme jasap.

Vedomstvonyń málimetinshe, Aqmola oblysy ákimi Ermek Marjyqpaev pen TJD bastyǵy Nurlan Atyǵaev «Qazavıaqutqarý» AQ-nyń Mı-8 tikushaǵymen ormandy dala alabyn áýeden baqylap shyqty.

«Ushý barysynda saǵat 15:05 shamasynda Zerendi aýdanyndaǵy «Kókshetaý» memlekettik ulttyq tabıǵı parkiniń sańyraýqulaq ormanshylyǵynyń aýmaǵynda orman órti anyqtaldy. Sol sebepti aımaq basshysy otyrǵan tikushaq órt shyqqan jerge qonyp, bortta bolǵandar qyzyl jalyndy aýyzdyqtaýǵa kiristi. Alaıda 20 m/s ekpindi jel órttiń órshý qaýpin arttyrdy. Dereý oqıǵa ornyna «Kókshetaý» MUTP, «Vıktorovka» JShS, Aıdabol spırt zaýytynan jáne Aqmola oblysy TJD barlyǵy 30-dan astam adam jáne 7 birlik tehnıka tartyldy», - dedi vedomstvodan.

Ákimdiktiń baspasóz qyzmeti atap ótkendeı, jedel qımyldyń arqasynda órt saǵat 15:35-te oqshaýlanyp, 16:00-de sóndirildi.

«Ormandy alqaptardy áýeden baqylaýdyń artyqshylyqtary bar. Búgin soǵan kóz jetkizip otyrmyz. Áýeden baqylaýdyń arqasynda órtti der kezinde baıqap, taralýyna jol berilmedi», - dedi Ermek Marjyqpaev.

Osyǵan deıin Qorǵaljyn qoryǵyndaǵy órt sóndirilgenin jazǵan edik.