Zerendide baıkerlerdiń «Road Freedom Fest» festıvali ótti
KÓKShETAÝ. QazAqparat - Aqmola oblysynda baıkerlerdiń «Road Freedom Fest» festıvali ótti, dep habarlaıdy QazAqparat tilshisi.
«Visit Aqmola» týrıstik aqparat ortalyǵynyń málimetinshe, bul joly baıkerler jyldaǵy dástúr boıynsha Zerendi aýdanynyń Elikti taý shańǵysy bazasynda bos qosty. Sharaǵa Aqmola oblystyq týrızm basqarmasy, sondaı-aq, Elikti taý shańǵy bazasynyń ákimshiligi men «Road Brazers» baıkerler klýby uıytqy boldy.
«Motoklýbtyń alǵa qoıǵan maqsaty - týrısterdi barynsha kóptep tartý arqyly óńirdiń týrıstik áleýetin arttyrý. Elikti saıabaǵynda ótetin festıvalge qatysýshylar eki kún boıy mádenı sharalardy tamashalady, alǵashqy kúni áýesqoılar arasynda kúsh ekstrıminen Soltústik Qazaqstan kýbogi sarapqa salyndy. Budan bólek, Nur-Astana, Kókshetaý, Qaraǵandy jáne Atbasar qalalarynan kelgen «Djaraıd», «Perıfırııa», «Vremena goda», Bend «Rýbıkon» tárizdi vokaldy-aspapty ansamblder men «Angely Tmy» jáne Ta «Bend» rok toptarynyń kontserti uıymdastyryldy», deıdi «Visit Aqmola» týrıstik aqparat ortalyǵynyń baspasóz qyzmetinen.
Festıvaldiń ekinshi kúni Motokrostan QR Chempıonatynyń besinshi kezeńi jáne motosportshylar arasynda ashyq kýbogi ótti.
Festıval barysynda onyń qonaqtaryna shatyr lageri tigilip, «Elikti Park» demalý bazasynda jaıly nomerler usynyldy. Budan bólek, tamaqtaný oryndary men estelik syılyqtar, moto jáne rok atrıbýttaryn saýdalaıtyn sóreler jumys istedi. Jalpy, festıvalge qatysýshylar «Elikti Park» demalý bazasynda jaıly demalýy úshin jaǵdaı jasaǵan uıymdastyrýshylarǵa alǵystaryn bildirdi.
