Zerendi kýrorttyq aımaq retinde qarqyndy damıtyn bolady
NUR-SULTAN. QazAqparat - Aqmola oblysyndaǵy Zerendi demalys aımaǵy endi Býrabaı kýrortty aımaǵy sekildi qarqyndy damıtyn bolady, dep habarlaıdy «Habar 24».
Sebebi óńirde týrızmdi órkendetýdiń jol kartasy ázirlendi. Jalpy quny 28 mlrd teńge bolatyn jobanyń aıasynda jol jóndeý, káriz qubyrlaryn tartý, demalys oryndaryn salý sekildi 58 is-shara qarastyrylǵan. Zerendi - Býrabaı sekildi aty álemge áıgili bolmasa da, tabıǵaty kórkem, tynyǵýǵa jaıly, janynda kóli men taýy bar shaǵyn ǵana demalys aımaǵy. Qazir munda 30 shaqty týrıstik nysan bar. Ári olardyń qatary jyl sanap kóbeıip keledi.
Kásipker Aqmaral Omarova Zerendini jany súıedi.
Onyń aıtýynsha, bul jerdiń aýasynyń ózi erekshe. Tylsym tabıǵaty adamdy ózine eriksiz baýrap alady. .
Qazir olar jazǵy maýsymǵa qyzý daıyndyq ústinde. Al kelýshilerdiń kóńilinen shyǵý úshin 9 birdeı aǵash úı turǵyzylǵan.
«Bizdiń bar maqsat-mindetimiz - kelýshilerdiń erekshe demalýyna jaǵdaı jasaý. Ol úshin qoldan kelgenniń bárin isteımiz. Al memleket tarapynan tıisti ınfraqurylym jasalsa deımiz»,-deıdi kásipker Aqmaral Omarova.
«Tıisti ınfraqurylym jasalady», - deıdi salaǵa jaýapty mamandar.
ıAǵnı jańa jobanyń sheńberinde Zerendiniń mańaıyndaǵy joldardyń barlyǵy tegistelip, káriz júıesi tartylady. Eń bastysy, Zerendiden ary Soltústik Qazaqstan oblysynyń Imantaý jáne Aıyrtaý demalys aımaqtaryna qaraı jańa jol salynbaq.
Oblys ákiminiń orynbasary Marat Iǵalıdiń aıtýynsha, «Aýyl - el besigi» degen baǵdarlama boıynsha respýblıkalyq bıýdjetten Zerendige 1 mlrd 300 mln teńge bólinbek.
«Jol bolsa, Reseı jaqtan keletin týrıster sany 2 esege ósedi. Jańa jobanyń ishinde tek jol jóndeý ǵana emes, týrısterdi qyzyqtyratyn túrli baǵdarlamalar da ázirlengen»,-deıdi ol.
Zerendi aýdandyq kásipkerlik bóliminiń jetekshisi Kúlııa Beksultanovanyń sózinshe, óńirde qazir birneshe týrıstik baǵyttar ázirlenýde. Máselen, saıahatshylar Isakovka aýyldyq okrýgine qarasty Áýlıebulaqqa, odan ári Áýlıetasqa bara alady. Úlgili aýylynyń mańyndaǵy sarqyrama da kelýshilerdi qyzyqtyrmaı qoımaıdy. ıAǵnı týrıster tek Zerendiniń ózine ǵana kelip-ketpeı, mańaıdaǵy barlyq kórikti jáne kıeli jerlerdi aralaýǵa múmkindigi bar.
Zerendi oblys ortalyǵy Kókshetaý qalasynan 45 shaqyrym jerde ǵana ornalasqandyqtan, qala turǵyndarynyń jartysynan astamy tynyǵý úshin Zerendini tańdaıdy eken. Odan bólek, reseılik týrıster de kóptep keledi.
