Zerendi aýdanynda 36 páterli úı men jańa kópir paıdalanýǵa berildi
KÓKShETAÝ. QazAqparat - El Táýelsizdiginiń 30 jyldyǵyn merekeleý aıasynda jáne Nur-Sultan qalasynyń kúni qarsańynda Aqmola oblysynyń Zerendi aýdanynda 36 otbasy jańa páterli boldy, dep habarlaıdy QazAqparat tilshisi.
Aýdan ákimdiginiń málimetinshe, baspanaly bolǵandardyń deni halyqtyń áleýmettik osal toptary. Jańa páterlerdiń kiltterin aımaq basshysy Ermek Marjyqpaev tapsyryp, qýanysh ıelerin quttyqtady.
«Qazaqstan Respýblıkasy Táýelsizdiginiń 30 jyldyǵyn merekeleý aıasynda sizdermen birge osy tamasha oqıǵanyń qýanyshyn bóliskenime qýanyshtymyn – bizdiń turǵyndar kópten kútken jańa 36 páterli turǵyn úıdiń kiltterin tabystap otyrmyn. Sizderdi qonys toıymen quttyqtaımyn!»,- dedi oblys ákimi Ermek Marjyqpaev.
Aıta ketsek, Zerendi aýdanynda halyqtyń áleýmettik osal toptary úshin Zerendi aýylynda taǵy bir 45 páterli turǵyn úıdiń qurylysy josparlanýda, joba boıynsha qurylys-montajdaý jumystarynyń quny 289 mıllıon teńgeni quraıdy.
Sonymen birge, Zarechnoe aýylynda Shaǵalaly ózeni arqyly ótetin kópir salynyp, paıdalanýǵa berildi. Endi jalpy 930-dan astam turǵyny bar Zarechnyı jáne Elikti aýyldarynyń turǵyndary osy kópir arqyly qatynaıtyn bolady.
«Kólik ınfraqurylymy bıznesti damytýdyń mańyzdy faktory ekeni belgili. Eldi mekenderdiń ózara qarym - qatynasy jergilikti aýyl sharýashylyǵy taýaryn óndirýshilerdiń logıstıkasyn jolǵa qoıýǵa kómektesedi, óıtkeni jaıylymdyq jáne jem-shóp daıyndaıtyn jerlerdiń negizgi bóligi Shaǵalaly ózeniniń syrtynda ornalasqan», - dep atap ótti óz sózinde aımaq basshysy.
Úsh jolaqty kópirdiń uzyndyǵy 75 metrdi quraıdy. Bir jaǵynda jaıaý júrginshilerge arnalǵan jol bar. Jobanyń quny 368 mıllıon teńgeden asady, qurylys jumystaryn «Býka» JShS júrgizgen.
