Zerendide ótken halyqaralyq marafonǵa 11 elden 1,5 myńǵa jýyq qatysýshy jınaldy
KÓKShETAÝ. KAZINFORM — Zerendide besinshi mereıtoılyq halyqaralyq ZERENDA HALF MARATHON marafony ótip, oǵan sport pen belsendi ómir saltyn ustanatyn 1,5 myńǵa jýyq adam qatysty.
Jarysqa Qazaqstannyń ár óńirinen kelgen sportshylarmen qatar, Reseı, Germanııa, Polsha, Italııa, Slovenııa, Vengrııa, Ulybrıtanııa, AQSh, Belarýs jáne Ózbekstannan qatysýshylar keldi.
World Athletics talaptaryna saı sertıfıkattalǵan kórkem marshrýttar Zerendi kóliniń mańyndaǵy asfalttalǵan joldarmen, orman men qyrattardyń arasymen ótti. Qatysýshylar kúzgi tabıǵattyń erekshe kórinisin tamashalap, jarystyń atmosferasyn sezindi.
Uıymdastyrýshylar qatysýshylardyń túrli deńgeıdegi daıyndyǵyn eskerip, alty túrli qashyqtyq daıyndady. Baǵdarlamada balalar jarysynan bastap, 21,1 shaqyrymdyq jartylaı marafon, kúrdeli 30 shaqyrymdyq Hills júgirýi jáne skandınavııalyq júriske arnalǵan Nordic Walk baǵyty boldy.
— Jalpy, oblys basshylyǵy tarapynan buqaralyq sportty damytýǵa erekshe kóńil bólinedi. Sońǵy bir jyldyń ishinde oblys aýmaǵynda 50-den astam balalar sport alańy, sondaı-aq 13 iri sport nysany salyndy. Onyń jeteýi aýyldyq jerlerde ornalasqan, — dedi Aqmola oblysy ákiminiń orynbasary Dosulan Aıtbaev.
Jarystyń 10 shaqyrymdyq qashyqtyǵynda birinshi bolyp márege jetken Erlan Taıtleýov te jeńisin kútpegenin aıtty.
— Men Astanadan keldim, bul men úshin kútpegen nátıje boldy. Negizinen shańǵy sportymen aınalysamyn, al sońǵy úsh-tórt jylda marafondarǵa belsendi qatysa bastadym. Bastapqy maqsatym úzdik bestikke kirý edi. Alaıda márege jaqyndaǵanda adrenalınniń áserimen qarqyn qosyp, birinshi bolyp keldim. Osyndaı kórikti jerde júgirý — eki ese lázzat, — dedi Erlan Taıtileýov.
Ol uıymdastyrýshylar men jarysqa qatysqan sportshylarǵa tamasha atmosfera úshin alǵysyn bildirdi.
Zerendi marafonynyń jyl saıynǵy qatysýshylar sanynyń artýy buqaralyq sportqa degen qyzyǵýshylyqtyń joǵary ekenin kórsetedi.
Jarysqa ártúrli jastaǵy belsendi ómir saltyn ustanýshylar qatysyp keledi. Sportta jas shekteýi joq ekenin 77 jastaǵy eń egde qatysýshynyń jarysqa qatysýy da dáleldedi.
