«Zeren-2019»: Kóshbasshy jastar kásipkerlikti damytýdyń qyr-syrymen tanysty
KÓKShETAÝ. QazAqparat - Elimizdiń kóshbasshy jastary kásipkerlikti damytýdyń basym baǵyttarymen tanysty, dep habarlaıdy QazAqparat tilshisi.
Aqmola oblysyndaǵy «Zeren-2019» respýblıkalyq jastar bilim lageriniń birinshi aýysymynyń jumysy jalǵasýda. Búgin birneshe baǵyt boıynsha trenıngter ótkizildi. Onyń ishinde elimizdiń ár óńirinen kelgen kóshbasshy jastar kásipkerlik oılaýdy damytý, ıdeıalardy kommertsııalandyrýdyń jáne masshtabtaýdyń jańa tásilderimen tanysty.
«Men Pavlodar oblysynan keldim. Meniń jobam «Intellektýaldy menshik nysandaryn kommertsııalandyrý» dep atalady. Jobanyń máni Qazaqstannyń barlyq qalalarynda kásiporyndar ashyp, olarmen jumys isteý. Mundaǵy basty tabys kózi -tehnologııalyq problemalardy tabý. Mysaly: Nan pisiretin kombınatta nan kúıip kete beredi derlik. Biz jas ónertapqyshty nemese jas ónertapqyshtyń qoldanystaǵy ǵylymı jobasyn taýyp, ony osy tehnologııalyq problema kórip otyrǵan kompanııaǵa usyný. Osy, ıaǵnı, deldal bolý arqyly tabys tabý. Mundaı problemasy bar kompanııalar elimizde jeterlik.
Jobamyzdyń ekinshi bóligi ıntellektýaldy áleýetti yntalandyrý. Ár adamnyń boıynda ónertapqyshtyq bar. Mektep oqýshysy, jas nemese eresek adam bolsyn, sonyń boıyndaǵy osy ónertapqysh jobany anyqtap, sol arqyly bıznes qurý. Men komandamda ІT jobasy sııaqty kóptegen baǵyttaǵy jobalardy qoldaıtyn adamdar bar. Qazir osyndaı jobalar Petropavl qalasynda sátti júzege asyrylyp, qomaqty tabys taýyp otyr. Biz olardyń maqsattaryna jetýine, tıimdi nátıje alý úshin olardyń jumystaryn baǵyttaý jáne úılestirýine kómektesemin. Sondaı-aq, óz mamandyǵym boıynsha zańgerlik jáne patent ıesi retinde kómek beremin», dep atap ótti S.Toraıǵyrov atyndaǵy Pavlodar memlekettik ýnıversıteti «ıýrısprýdentsııa» kafedrasynyń 1-shi kýrs magıstranty Damır Bekbaev.
Onyń sózinshe, trenıng kezinde jastar kásipkerlik oılaýdy damytý, ıdeıalardy kommertsııalandyrýdyń jáne masshtabtaýdyń jańa tásilderi jóninde aqparat alatyn bolady.
