Zere, Dara, Sara: Túrkistan oblysynda 5 balanyń anasy dúnıege úshem ákeldi
TÚRKІSTAN. KAZINFORM – Túrkistan oblystyq №1 perınataldyq ortalyǵynda úshem dúnıege keldi.
3 aqpan kúni Saryaǵash aýdanynyń turǵyny júktiliktiń 33 aptasynda merziminen buryn bosanǵan. Jańa týǵan sábılerdiń salmaǵy 2400, 2230 jáne 2060 gramm boldy.
Oblystyq densaýlyq saqtaý basqarmasynyń habarlaýynsha, merziminen buryn týǵan úshem patologııa bólimshesine jatqyzylyp, dárigerlerdiń turaqty baqylaýyna alynǵan. Alǵashqy táýlikte náresteler tynys alý apparaty arqyly dem alsa, ekinshi táýlikten bastap ózdiginen tynys ala bastaǵan.
– Qazirgi tańda nárestelerdiń jaǵdaıy qanaǵattanarlyq. Olar ana sútimen qorektenip, taǵamdy qalypty qorytyp jatyr. Baqylaý kezeńinde sábılerdiń salmaǵy 2350, 2244 jáne 2019 grammǵa jetti, - delingen habarlamada.
Dárigerlerdiń oń qorytyndysyna sáıkes, úshem úılerine shyǵaryldy. Sábılerge Zere, Dara jáne Sara esimderi qoıyldy.
Aıta keteıik, bul otbasynda buǵan deıin úsh ul men eki qyz dúnıege kelgen.
Budan buryn Túrkistan turǵyny 40 jasynda úshem bosanǵanyn jazǵan edik.