«Zerde» holdıngin taratý arqyly jylyna 3 mlrd teńge únemdeýge bolady

NUR-SULTAN. QazAqparat – «Zerde» holdıngi taratylǵannan keıin «UAT» AQ tikeleı QR Tsıfrlyq damý, ınnovatsııalar jáne aeroǵarysh ónerkásibi mınıstrligine beriledi, dep habarlaıdy QazAqparat tilshisi.

Mınıstrliktiń «QazAqparat» agenttiginiń saýalyna bergen jaýabynda kórsetilgendeı, holdıngti taratý arqyly jylyna 3 mıllıard teńgege jýyq qarajatty únemdeý kózdelip otyr. Sondaı-aq holdıngti taratý arqyly artyq qyzmetterden arylyp, jaýapkershilikti naqty bólip alýǵa bolady.

Qazirgi tańda «Zerde» holdınginiń qurylymynda úsh enshiles uıym bar: «Astana Hub» tehnoparki, «UAT» AQ jáne «Qazinnovations» AQ. Búgingi tańda holdıng qyzmetkerleriniń shtaty 230 adamdy quraıdy.

«Zerde» holdıngi taratylǵannan keıin «Ulttyq aqparattyq tehnologııalar» aktsıonerlik qoǵamy tikeleı QR TsDIAÓM qaramaǵyna beriledi.

Budan basqa, «Innovatsııalyq tehnologııalar parki» DKQ, «Astana Hub» KQ jáne «QazInnovations» Innovatsııalardy damytý jónindegi ulttyq agenttigi» AQ-ny bir uıymǵa biriktirý josparlanýda.

Buǵan deıin habarlanǵandaı, 2016-2021 jyldar kezeńinde holdıngtiń jınaqtalǵan shyǵyny 7 mlrd teńge boldy.

Eske sala keteıik, sáýir aıynda Memleket basshysy Qasym-Jomart Toqaev «Zerde» holdıngin reformalaýdy tapsyrǵan bolatyn.

Úkimettiń keńeıtilgen otyrysynda Qazaqstan Respýblıkasynyń Prezıdenti Qasym-Jomart Toqaev elimizdegi tsıfrlandyrýdyń barysyna kóńili tolmaıtynyn aıtqan edi.

«Esep komıtetiniń synyna ushyraǵan «Zerde» ulttyq holdınginiń jumysyn jaqsartýdy tapsyrdym. Premer-mınıstr tsıfrlandyrýdyń kýratory retinde osy máselege erekshe nazar aýdarýy kerek», - dedi Qasym-Jomart Toqaev.