Zerde holdıngi taratylsa da, qyzmetkerlerdiń tıisti tólemderi tolyq saqtalady

NUR-SULTAN. QazAqparat – Tsıfrlyq damý, ınnovatsııalar jáne aeroǵarysh ónerkásibi mınıstrligi «Zerde» holdıngin taratý týraly sheshim boıynsha resmı ustanymyn jarııalady, dep jazady QazAqparat tilshisi.

«Bul trasnformatsııa «Zerde» holdınginiń óndiristik personalyna áser etpeıtinin erekshe atap ótemiz. «Servıstik ıntegrator» fýnktsııalaryn «Tsıfrlyq úkimetti qoldaý ortalyǵy» RMK-ǵa berý máselesin de qaraý qajet. «Tsıfrlyq úkimetti qoldaý ortalyǵy» RMK Memleket basshysynyń tikeleı tapsyrmasy boıynsha memlekettik organdar úshin jetekshi taldaý ortalyǵy retinde quryldy. Sondyqtan Úkimet «Servıstik ıntegrator» fýnktsııalaryn «Zerdeden» «Tsıfrlyq úkimetti qoldaý ortalyǵy» RMK-na berý týraly sheshim qabyldady. Onyń qurylymynda Tsıfrlyq transformatsııa ortalyǵy jumys isteıdi», - delingen resmı málimette.

Holdıngtiń qyzmeti Tsıfrlyq úkimetti qoldaý ortalyǵyna beriletindikten, sol qyzmetti iske asyratyn mamandar da jumys ornyn aýystyrmaq.

«Bul rette, RMK-ǵa jumysqa aýysqan qyzmetkerler tıesili barlyq tólemderdi tolyq kólemde alady. Memlekettik IT-sektordy basqarý isin reformalaý kadrlyq áleýetti saqtaı otyryp iske asyrylady.

Mınıstrlik qyzmetkerlerdiń áleýmettik turǵyda joǵary deńgeıde qorǵalýyn qamtamasyz etý, keıinnen olardyń mamandyǵy men biliktiligine sáıkes jumysqa ornalasý múddelerin negizge alatyn bolady. Holdıngti taratý kezinde búkil protsess ashyq jáne aıqyn ótedi. Qyzmetkerlerdiń basym kópshiligi jańa jobalarmen birlesip jumys isteýdi jalǵastyrý úshin tsıfrlyq vedomstvo júıesinde qalady dep úmittenemiz», - dep jazdy vedomstvonyń baspasóz qyzmeti.

Eske salsaq, buǵan deıin Tsıfrlyq damý mınıstri Baǵdat Mýsın «Zerde» holdıngin taratýdy usynǵan edi.