«Zenıtke» qarsy jaqsy fýtbol kórsetýge tıispiz - Karpovıch
ASTANA. QazAqparat - Almatylyq «Qaırat» fýtbol klýbynyń bas bapkeriniń birinshi assıstenti, belgili qazaqstandyq fýtbolshy Andreı Karpovıch «Zenıtke» qarsy oıyn qyzyqty ári paıdaly bolatynyna senimdi, dep habarlaıdy «SPORTINFORM» SAA tilshisi.
«Jas fýtbolshylar úshin bul úlken tájirıbe. Olar múlde basqa deńgeıdegi fýtboldy kórý múmkindigine ıe bolady. Bul - fýtbolshylardyń damýyna kómektesedi», - deıdi Karpovıch.
Bapkerdiń orynbasary jankúıerler men BAQ osy oıynǵa qyzyǵýshylyq tanytyp otyrǵanyn aıtty.
«Joldastyq kezdesýdiń ótetini týraly jarııalanǵaly beri qazaqstandyq jáne reseılik buqaralyq aqparat quraldarynyń qyzyǵýshylyǵy baıqaldy. Sankt-Peterbýrgke kelip túskennen-aq Andreı Arshavınge, bizdiń komandaǵa degen yqylas erekshe boldy. Bul árıne, qýantady», - deıdi ol.
Andreı Karpovıchtiń aıtýynsha, komanda «Zenıtke» qarsy oıynda jeńis úshin alańǵa shyǵatynyn tilge tıek etti.
«Qashanda jeńis úshin oınaý qajet. Kezdesýde barynsha alǵa umtylamyz. Álem chempıonaty ótken tamasha stadıonǵa jaqsy match úshin keldik. Biz jaqsy fýtbol kórsetýge mindettimiz», - deıdi Karpovıch.
Eske sala keteıik, «Zenıt» - «Qaırat» joldastyq kezdesýi 9 qyrkúıek kúni Astana ýaqytymen 21:00-de bastalady. Oıynnyń tikeleı kórsetilimin YouTube vıdeohostıngindegi «Zenıt TV» arnasynan tamashalaýǵa bolady.
