Zeńgir taýdyń eteginde jaıqalyp tur — Katonqaraǵaı kúnbaǵys alqabynan reportaj
ÓSKEMEN. KAZINFORM — Shyǵys Qazaqstan oblysyndaǵy Katonqaraǵaı aýdanynda jazdyń ekinshi jartysynda gúldeıtin kúnbaǵys alqaptary sary túske boıalyp, taýlardyń saıasynda erekshe qulpyryp tur. Kazinform tilshisi nazarlaryńyzǵa sol sáttiń fotosýretterin usynady.
Katonqaraǵaı aýdany tabıǵaty negizinen taýly ári ormandy bolǵandyqtan, ony kóbine Altaıdyń kórkem landshaftary, ulttyq parki jáne maral sharýashylyǵymen baılanystyrady.
Degenmen sońǵy jyldary aýdannyń keıbir jazyq bólikterinde kúnbaǵys alqaptary da kóbeıip, olar týrısterdiń qyzyǵýshylyǵyn týdyryp keledi.
Kúnbaǵystar jazdyń ekinshi jartysynda gúldeıdi. Aspanmen astasqan taýlardyń eteginde erekshe qulpyryp turǵan kúnbaǵystar kózdiń jaýyn alady. Ásirese raýandap tań atqanda jáne kún batar shaqta bul fotoǵa túsýge tapsyrmas jer.
Kúnbaǵys óńirde tek ásem kórinis úshin ǵana emes, aýyl sharýashylyǵy daqyly retinde ósiriledi. Onyń tuqymy taǵam úshin paıdalanylyp, maı óndirýge jiberiledi. Sonymen qatar bul daqyl topyraq qunarlyǵyn saqtaýǵa da baǵyttalady.
Katonqaraǵaıdaǵy kúnbaǵys alqaptary óńirdiń tabıǵı sulýlyǵyna erekshe reńk berip, ekotýrızmdi damytýǵa yqpal etip otyr. Sondyqtan jaıdary jaz kezinde bul jerge tabıǵatty tamashalap, fotosessııa jasaý úshin keletin qonaqtardyń sany artyp keledi.
Eske salsaq, osyǵan deıin Buqtyrma jaǵalaýynan fotoreportaj usynǵan bolatynbyz.
