«Zena» laqap atymen tanymal aqtóbelik polıtseıge sot úkim shyǵardy
AQTÓBE. QazAqparat - Aqtóbede «Zena» laqap atymen tanymal jol-patrýldik polıtsııa qyzmetkeri Jannat Ahmetova ómir boıy memlekettik, quqyq qorǵaý salasynda jumys isteı almaıdy. Ol «aǵa leınenant» sheninen aıyryldy, dep habarlaıdy QazAqparat tilshisi.
Aqtóbe oblystyq Іshki ister departamentiniń jol-patrýldik polıtsııa qyzmetkeri Janna Ahetova men onyń áriptesi Mıras Ibadýllaev Qylmystyq kodekstiń «Laýazymdyq ókilettilikterdi teris paıdalaný» baby boıynsha aıyptaldy. Іs sotqa túsken soń eki polıtsııa qyzmetkeri taǵylǵan aıypty tolyq moıyndap, keshirim suraǵan bolatyn. Olar J.Ahetova jalǵyzbasty anany ákimshilik jaýapkershilikten qutqarý úshin baspahanadan jańa hattama jasatyp alady. Al bul istiń basy-qasynda júrgen áriptesi M.Ibadýllaev bárin bile tura zańsyzdyqqa jol bergen. Búgin sýdıa Kúzembaeva qysqartylǵan tártipte ótken iske úkim shyǵardy.
«Aıyptalýshy Jannat Ahetova Qylmystyq kodekstiń «Laýazymdyq ókilettilikterdi teris paıdalaný» baby boıynsha aıypty dep tanylyp, 2 jylǵa bas bostandyǵyn shekteý jazasy taǵaıyndalsyn. Jeke múlki tárkilenip, ómir boıy memlekettik jáne quqyq qorǵaý salasynda jumys isteý quqyǵynan aıyrylsyn. «Aǵa leıtenant» sheninen aıyrylsyn. QR Táýelsizdiginiń 25 jyldyǵyna oraı raqymshylyq jasalyp, bas bostandyǵyn shekteý sekildi negizgi jazasy alynyp tastalady», - dedi sýdıa Kúzembaeva.
Al onyń áriptesi M.Ibadýllaev ta raqymshylyqqa iligip, tek ómir boıy memlekettik jáne quqyq qorǵaý salasynda eńbek etý quqyǵynan aıyryldy.
Sot úkimi kúshine engen joq.
