Zelenskııge aqyl aıtqan Anna Bashınskaıanyń ornyna jańa depýtat saılandy

Keshe № 4 birmandattyq aýmaqtyq saılaý okrýgi boıynsha Almaty qalasy máslıhatynyń shyǵyp qalǵan depýtatynyń ornyna jańa adam saılandy, dep habarlaıdy Kazinform.

Almaty aýmaqtyq saılaý komıssııasynyń málimetinshe, saılaýshylar tizimine 52 015 azamat engizildi.

Daýys berýge — 7117 saılaýshy, daýys berýge arnalǵan úı-jaıdan tys — 13 adam qatysty.

Kandıdattardyń jalpy sany — 6.

№ 4 birmandattyq aýmaqtyq saılaý okrýgi boıynsha Almaty qalasy máslıhat depýtatyn saılaýynda mynadaı nátıje shyqty:

E. Bakarasova — 4652 daýys jınady;
A. Moldasanovqa — 640 adam daýys berdi;
M.Kúketaevany — 573 saılaýshy qoldady;
J. Sabraıymǵa -351 daýysy berildi;
D. Laktıýshın — 243 daýys jınady;
N.Novoseltseva — 291;
«Barlyǵyna qarsy» belgisi bar bıýlleten sany — 203.

«Saılaý qorytyndysymen № 4 birmandattyq aýmaqtyq saılaý okrýgi boıynsha Almaty qalasy máslıhatynyń depýtaty bolyp Elena Evgenevna Bakarasova saılandy», — dep habarlady Almaty qalasy aýmaqtyq saılaý komıssııasynan.

Aıta keteıik, Elena Bakarasova — «Kontsern Bakarassov» JShS bas dırektory.

Aıta keteıik, depýtat Anna Bashınskaıa Ýkraına prezıdenti Vladımır Zelenskııdiń Deutsche Welle basylymyna bergen suhbatyndaǵy Qyrymdy qaıtarý týraly málimdemesine «Zelenskıı myrza, Qyrymnan kóri Túrkııa durys, ol jaqtyń aýa raıy qolaıly» degen maǵynada pikir bildirgen edi.

Depýtattyń bul pikiri áleýmettik jeli qoldanýshylarynyń narazylyǵyn týǵyzyp, olar depýtattyń mandatyn tapsyrýyn talap etti.

Keıinirek depýtat osy pikiri úshin qazaqstandyqtardan keshirim surady.

Amanat partııasy Anna Bashınskaıanyń máselesi tez arada uıymnyń tıisti qurylymdarynda qaralatynyn habarlady. 

Sosyn depýtat mandatyn tapsyrdy.