Zelenskıı Reseımen kelissózderdi Ázerbaıjanda ótkizýdi usyndy
ASTANA. KAZINFORM – Ýkraına Prezıdenti Vladımır Zelenskıı Reseımen kelissózderdiń kelesi kezeńin Ázerbaıjanda ótkizýge daıyn ekenin málimdedi.
Bul týraly ol Gabalada Ázerbaıjan Prezıdenti Ilham Álıevpen kezdesýden keıin baspasózge jasaǵan málimdemesinde aıtty.
– Biz Ázerbaıjan Prezıdentine úshjaqty kelissózderge daıyn ekenimizdi jetkizdik. Buǵan deıin mundaı kezdesýler Túrkııada, keıin Shveıtsarııada amerıkalyq áriptesterdiń qatysýymen ótken bolatyn. Eger Reseı dıplomatııaǵa daıyn bolsa, jaqyn arada Ázerbaıjanda kelissóz ótkizýge ázirmiz, – dedi Vladımır Zelenskıı.
Onyń aıtýynsha, Ýkraına kelissózderdiń úshjaqty formatyn qaıta jandandyrýǵa daıyn.
Kezdesý barysynda ekijaqty qatynastar da talqylandy. Ilham Álıev energetıka, saýda jáne ónerkásip salalaryndaǵy yntymaqtastyqtyń keńeıip kele jatqanyn atap ótti.
– Elderimiz arasyndaǵy taýar aınalymy 500 mln dollardan asty jáne ony ulǵaıtýǵa áleýet bar, – dedi ol.
Sonymen qatar taraptar áskerı-tehnıkalyq yntymaqtastyq pen birlesken óndiris máselelerin qarastyrdy.
Ýkraına basshysy Ázerbaıjanǵa gýmanıtarlyq kómek pen ýkraınalyq balalardy qoldaǵany úshin alǵys bildirdi. Kelissózder qorytyndysy boıynsha alty qujatqa qol qoıylǵany habarlandy.
Aıta keteıik, buǵan deıin Ýkraına men AQSh arasyndaǵy kelissózderdiń ekinshi kúni Florıdada ótken bolatyn.
