Zelenskıı Reseımen energetıkalyq bitim jónindegi kelisimdi rastady

ASTANA. KAZINFORM – Ýkraına Prezıdenti Vladımır Zelenskıı Ýkraına men Reseı arasynda qysqy sýyq kezeńge arnalǵan «energetıkalyq bitim» týraly kelisimderge qol jetkizilgenin rastady, dep habarlaıdy DW.

Ol AQSh prezıdenti Donald Tramptyń Kıev pen Ýkraınanyń basqa qalalaryn Reseıdiń soqqylarynan qorǵaý múmkindigi týraly málimdemesin quptaǵanyn aıtty.

— Prezıdent Tramptyń osy qys kezinde Kıev pen Ýkraınanyń basqa qalalaryna Reseıdiń soqqylarynan qaýipsizdik qamtamasyz etý múmkindigi jónindegi mańyzdy málimdemesin quptaımyn, — dep jazdy Zelenskıı áleýmettik jelilerde.

Onyń aıtýynsha, energetıka — ómirdiń negizi, sondyqtan Kıev ony qorǵaý jolyndaǵy seriktesterdiń kúsh-jigerin joǵary baǵalaıdy.

— Bul máseleler Ámirlikte talqylandy. Kelisim oryndalady dep úmittenemiz. Deeskalatsııaǵa baǵyttalǵan qadam soǵysty aıaqtaýǵa qaraı naqty ilgerileýge yqpal etedi, — dep qosty Ýkraına kóshbasshysy.

Ýkraına bıligi birneshe ret aıazdy kezeńde eldiń energetıkalyq júıesin qorǵaýdyń asa mańyzdy ekenin atap ótken.

Buǵan deıin Donald Tramp Aq úıde ótken otyrysta Vladımır Pýtınnen Kıev pen basqa qalalarǵa soqqy jasamaýdy jeke ózi suraǵanyn jáne Reseı prezıdentiniń bul ótinishke keliskenin málimdegen.

— Kóp adam bul qońyraý shalýdyń qajeti joq, odan eshteńe shyqpaıdy dedi. Biraq ol qońyraý shaldy, biz buǵan óte qýanyshtymyz, — dedi Tramp.

Onyń aıtýynsha, sońǵy bir aptada Ýkraınanyń astanasyna shabýyldardyń bolmaýy dál osy telefon qońyraýymen baılanysty.

Infraqurylymǵa soqqylardyń toqtaǵany týraly aqparat beısenbi kúni tańerteń áleýmettik jelilerde tarady. Alaıda demalys kúnderi Abý-Dabıde ótken kelissózderge qatysqan taraptar bul jóninde uzaq ýaqyt boıy resmı málimdeme jasaǵan joq.