Zelenskıı Reseımen áskerı tutqyndar almasqanyn rastady
ASTANA. KAZINFORM — Vladımır Zelenskıı Ýkraına Reseı tutqynynda bolǵan 175 adamdy qaıtarǵanyn málim etti, dep habarlaıdy VVS.

— Taǵy 22 otan qorǵaýshy aýysýdan tys is-sharalardyń arqasynda úılerine qaıtady. Olardyń arasynda Reseı oıdan shyǵarylǵan qylmystary úshin qýdalaǵan jaýyngerler men aýyr jaraqat alǵandar bar, — dep jazdy Zelenskıı.
Sonymen qatar, ol oralǵan áskerı qyzmetshilerdiń qatarynda — Qarýly Kúshterdiń, Áskerı-teńiz kúshteriniń, Ulttyq gvardııanyń, aýmaqtyq qorǵanys jáne shekara qyzmeti kúshteriniń sarbazdary, serjanttary men ofıtserleri bar ekenin atap ótti. Sonymen qosa Zelenskıı áskerılerdi aıyrbastaý kezindegi deldaldyq qyzmeti úshin Birikken Arab Ámirlikterine alǵys aıtty.
Buǵan deıin 175-ke 175 formýlasy boıynsha aıyrbastaý týraly Reseı Qorǵanys mınıstrligi de habarlaǵan edi.
Eske salsaq, seısenbide Reseı men AQSh basshylary telefon arqyly sóılesti. Taraptar Ýkraınada «barlyq energetıkalyq jáne ınfraqurylymdyq máseleler boıynsha atysty dereý toqtatý» týraly kelisti.
Bul rette Qasym-Jomart Toqaev AQSh pen Reseı prezıdentteri kelissóziniń qorytyndysyn quptaıtynyn jetkizdi.