Zelenskıı osy aptada AQSh-qa mańyzdy saparmen barýy múmkin
ASTANA. KAZINFORM — Amerıkalyq bıliktiń ákimshilik ókilderi ýkraınalyq sheneýniktermen Vladımır Zelenskııdiń osy aptada AQSh-qa saparmen kelý múmkindigin talqylap jatyr. Bul týraly 23 qarasha kúni CBS News telearnasy óz derekkózderine silteme jasap habarlady.
Onyń málimetinshe, Zelenskııdiń AQSh-qa jańa sapary Donald Tramptyń bıyl 27 qarashada merekelenetin Alǵys aıtý kúnine deıin Ýkraınadaǵy daǵdarysty retteý jóninde kelisim jasaýǵa baǵyttalǵan áreketteri aıasynda ótýi múmkin.
Sonymen birge telearna derekkózderi bul sapardyń júzege asýy AQSh pen Ýkraına arasyndaǵy Jenevadaǵy kelissózderdiń nátıjesine baılanysty bolatynyn atap ótti.
23 qarasha kúni Ýkraına prezıdenti ákimshiliginiń basshysy Shveıtsarııada ýkraın delegatsııasynyń eýropalyq seriktestermen jáne amerıkalyq delegatsııamen qaqtyǵysty toqtatý joldaryn talqylaý úshin kezdesýleri bastalǵanyn málimdedi. Buǵan deıin Reuters agenttigi aty-jóni atalmaǵan amerıkalyq sheneýnikke silteme jasap, Jenevadaǵy kelissózder barysynda Vashıngton men Kıev ókilderi qaqtyǵysty retteýdiń amerıkalyq josparynyń sońǵy tustaryn kelisýdi kózdep otyrǵanyn habarlaǵan.
22 qarasha kúni Eýroodaq elderiniń kóshbasshylary bul jospardyń birqatar tarmaqtarymen kelispeıtinderin jáne ony qaıta pysyqtaý qajettigin málimdedi.
Bloomberg agenttiginiń habarlaýynsha, AQSh-tyń jańa jospary Reseıge qarsy sanktsııalardy alyp tastaýdy da kózdeıdi.
Aıta ketsek, buǵan deıin EO, Ýkraına AQSh-tyń beıbitshilik josparyn 23 qarashada talqylaıtynyn jazǵanbyz.