Zelenskıı Maıamıde AQSh pen Ýkraına arasyndaǵy jańa kelissózder ótetinin málimdedi

ASTANA. KAZINFORM — Nıderlandqa saparlaǵan Ýkraına prezıdenti Vladımır Zelenskıı beıbitshilikti ornatý jónindegi kelissózderdiń aldaǵy qadamdary týraly aıtty, dep habarlaıdy VVS.

Nıderland premer-mınıstri Dık Shofpen ótken birlesken baspasóz máslıhatynda Zelenskıı amerıkalyq tarap Reseıge 20 tarmaqtan turatyn jańartylǵan beıbitshilik josparyn joldaıtynyn, odan jaýap alǵannan keıin Ýkraınamen jańa konsýltatsııalar ótkizetinin málimdedi.

Zelenskıı eki kún boıy Berlınde AQSh-tyń burynǵy prezıdenti Donald Tramptyń arnaıy ókili Stıv Ýıtkoffpen jáne AQSh prezıdentiniń kúıeý balasy Djared Kýshnermen kezdesken. Kelissózder qorytyndysy boıynsha Vashıngton Ýkraınaǵa zańdy turǵyda mindetteıtin qaýipsizdik kepildikterin berýge kelisken, alaıda eń kúrdeli másele — aýmaqtyq sheginister týraly suraq sheshilmeı qalǵan.

Máskeý Donetsk oblysynyń búkil aýmaǵynan ýkraın áskerin shyǵarýdy talap etýdi jalǵastyryp otyr. Óz kezeginde Ýkraına mundaı talaptardy qabyldaýǵa bolmaıtynyn málimdedi.

— Osy barlyq reaktsııalarmen amerıkalyq tarap Reseımen baılanysqa shyǵyp, sodan keıin AQSh-ta Ýkraınamen kelissózder toby deńgeıinde kezdesý ótedi, — dedi Zelenskıı. — Meniń oıymsha, bul aldaǵy kúnderi, múmkin demalys kúnderi nemese sál keıinirek bolady.

AQSh sheneýnikteri kelissózderdiń jańa raýndy Maıamıde ótýi múmkin ekenin aıtty. Zelenskıı bul konsýltatsııalarǵa ózi qatyspaıtynyn, kelissózderdi arnaıy toptar júrgizetinin naqtylady.

Zelenskıı taǵy ne aıtty:

• Eýropalyq odaqqa múshelik — qaýipsizdik kepildikteriniń eń mańyzdy bóligi.

• «Yqylastylar koalıtsııasyna» (atysty toqtatqannan keıin Ýkraınada bitimgershilik mıssııasyna qatysýǵa daıyn elder) shamamen 30 memleket kiredi. Ár eldiń róli aıqyndalǵanymen, taraptar ázirge egjeı-tegjeıin jarııalamaýǵa kelisken.

• Ýkraına 2026 jyly batys seriktesterinen 40–45 mlrd AQSh dollary kóleminde kómek alýǵa úmittenedi, al jalpy soma 210 mlrd dollarǵa jetýi múmkin. Bul — Eýropalyq odaqta buǵattalǵan reseılik aktıvterdiń mólsherlengen kólemi, olardy Ýkraına men keıbir eýropalyq elder Kıevti qarjylandyrý úshin paıdalanýdy josparlap otyr.

• Soǵys saldarynan keltirilgen zalal «200 mlrd dollardan úsh ese artyq».

Eske sala keteıik, buǵan deıin Eýropa kóshbasshylary Ýkraına úshin «kópultty kúsh» qurýǵa ýáde bergen bolatyn.

Al  Donald Tramp Ýkraınadaǵy soǵysty toqtatý týraly kelisim aıaqtalýǵa jaqyn ekenin aıtty.