Zelenskıı Qaýipsizdik keńesine Reseımen kelissózderdi jandandyrýdy tapsyrdy

ASTANA. KAZINFORM — Ýkraına prezıdenti Vladımır Zelenskıı Ulttyq qaýipsizdik jáne qorǵanys keńesiniń jańadan taǵaıyndalǵan hatshysy Rýstem Ýmerovke Reseımen Ystanbuldaǵy kelissóz protsesin jandandyrýdy tapsyrdy, dep jazady TASS.

«Búgin Rýstem Ýmerovpen Ýkraına Ulttyq qaýipsizdik jáne qorǵanys keńesiniń jáne Joǵarǵy Bas qolbasshy stavkasynyń jumysyn, sondaı-aq qorǵanys pen kelissózder salasyndaǵy jekelegen mindetterdi talqyladyq. Kelissózder baǵytyn jandandyrý qajet. Qazirgi tańda Ystanbuldaǵy ekinshi kezdesý sheńberindegi ýaǵdalastyqtardy oryndaý jalǵasyp jatyr. Bul protseske kóbirek serpin kerek», — dep jazdy Zelenskıı Telegram-arnasynda.

Buǵan deıin Reseı Syrtqy ister mınıstrliginiń resmı ókili Marııa Zaharova reseılik delegatsııanyń ýkraın tarapymen úshinshi kelissóz raýndyn ótkizý úshin Ystanbulǵa barýǵa daıyn ekenin málimdegen bolatyn.

Alaıda, ol Ýkraınadan jańa kelissózderge ázirlik jóninde eshqandaı belgi túspegenin atap ótti.

Sonymen birge ol Kıevtiń buryn qol jetkizilgen ýaǵdalastyqtar baǵytynda áreket etip, kelissóz protsesin jalǵastyratynyna úmit bildirdi.

Aıta keteıik, Ystanbulda ótken 26 mamyr men 2 maýsymdaǵy eki raýnd qorytyndysy boıynsha Reseı men Ýkraına «myńǵa myń» formýlasymen áskerı tutqyndardy almasýǵa jáne aýyr naýqas pen 25 jasqa deıingi tutqyndardy «barlyǵyna barlyǵyn» qaǵıdasymen qaıtarýǵa kelisken bolatyn. Osy kelisim aıasynda maýsym aıynda Reseı tarapy Ýkraınaǵa 6 060 qaza tapqan ýkraın áskerı qyzmetshisiniń denesin, al Ýkraına Reseıge 78 jaýyngerdiń denesin qaıtardy.

17 shilde kúni Reseı taǵy 1 000 ýkraın jaýyngeriniń denesin Kıevke tapsyrdy, al Ýkraına 19 reseılik sarbazdyń denesin qaıtardy.