Zelenskıı bitim týraly: Ýkraına Reseıdiń áreketine aına-qatesiz jaýap beredi

KIEV. KAZINFORM – Ýkraına prezıdenti Vladımır Zelenskıı Reseı tarapynan soǵys qımyldaryn toqtatý týraly sheshim qabyldanǵan jaǵdaıda, Ýkraına da dál sondaı áreket etetinin málimdedi, dep jazdy Anadoly.

Onyń aıtýynsha: «Tynyshtyqqa – tynyshtyqpen, shabýylǵa – qorǵanyspen jaýap beriledi».

– Eger Reseı shynymen de tolyq ári sózsiz tynyshtyq ornatýǵa daıyn bolsa, Ýkraına da dál solaı áreket etedi. Eger tynyshtyq shyn máninde ornasa, biz ony Pasha kúni aıaqtalǵan soń da uzartýdy usynamyz, – dep jazdy Zelenskıı Telegram paraqshasyna.

Ol buǵan deıin soǵysty 30 kúnge tolyq toqtatý týraly usynys jasalǵanyn, bul bastamany AQSh kótergenin, Ýkraına ony qoldaǵanyn, alaıda Reseı osy ýaqytqa deıin – 39 kún boıy bul usynysqa jaýap bermeı otyrǵanyn atap ótti.

Zelenskııdiń aıtýynsha, bul jaǵdaı Reseıdiń shynaıy nıetin kórsetedi.

– 30 saǵat – tek taqyryp úshin, al 30 kún – senim ornatýǵa múmkindik, – dedi ol.

Biraq Ýkraına Qarýly kúshteriniń Bas qolbasshysynyń málimetine súıensek, fronttyń keıbir baǵyttarynda Reseı tarapynan shabýyldar men artıllerııalyq soqqylar jalǵasyp jatyr. Sondyqtan Zelenskıı Máskeýdiń sózine senim joq ekenin aıtty:

– Biz Máskeýdiń qalaı manıpýlıatsııa jasaıtynyn jaqsy bilemiz, sondyqtan barlyq jaǵdaıǵa daıynbyz. Ýkraına qorǵanys kúshteri aqylmen jáne aına-qatesiz jaýap beredi. Árbir reseılik soqqyǵa laıyqty jaýap beriledi, – dedi Ýkraına prezıdenti.

Buǵan deıin habarlanǵandaı, Vladımır Pýtın Pasha meıramyna baılanysty ýaqytsha bitimge keletinin málimdedi.