Zelenskıı beıbit kelissózder ústeline qaıta oralýǵa daıyn — Tramp

ASTANA. KAZINFORM — AQSh prezıdenti Donald Tramp Kongreste sóılegen sózinde Ýkraına prezıdenti Vladımır Zelenskııden beıbit kelissózder ústeline qaıta oralýǵa daıyn ekenin bildiretin hat alǵanyn aıtty. Bul týraly BBC jazdy.

— Búgin men Ýkraına prezıdenti Zelenskııden mańyzdy hat aldym. Hatta: «Alystan munartqan beıbitshilikti jaqyndatý úshin Ýkraına múmkindiginshe tezirek kelissóz ústeline otyrýǵa daıyn. Ýkraınalyqtardan artyq eshkim beıbitshilikti qalamaıdy, — dedi Tramp.

Onyń aıtýynsha, Zelenskıı sondaı-aq «kez kelgen ýaqytta» taý-ken óndirisi týraly kelisimge qol qoıýǵa daıyn ekenin málimdedi.

Vladımır Zelenskıı kelissóz ústeline otyrýǵa daıyn ekenin bir kún buryn sopaq kabınette Tramppen aradaǵy qaqtyǵys týraly túsinikteme bergende málimdegen edi. Ol sondaı-aq Ýkraınanyń jer qoınaýy týraly kelisimge áli de daıyn ekenin aıtty.

— Men Ýkraınadaǵy qatygez urysty toqtatý úshin tynymsyz jumys isteımin. Mıllıondaǵan ýkraındyqtar men reseılikter osy jan túrshigerlik ári qatygez qaqtyǵysta ajal qushty nemese jaralandy. AQSh Ýkraınanyń qorǵanysyn qoldaý úshin júzdegen mıllıard dollar jiberdi, — dedi Tramp.

«Siz munyń taǵy bes jyl jalǵasqanyn qalaısyz ba?» — dep surady Tramp AQSh-tyń Ýkraınany qoldaýǵa Eýropaǵa qaraǵanda áldeqaıda kóp aqsha jumsaǵanyn taǵy da aıtty.

— Ókinishke qaraı, Eýropa Ýkraınany qorǵaýdan góri Reseıdiń munaıy men gazyn satyp alýǵa kóbirek aqsha jumsady. Oılanyp kórshi, — dedi ol.

Tramp Ýkraına týraly aıtqan kezde keıbir demokrattar zaldan shyǵyp ketti.

Eske sala keteıik, buǵan deıin Zelenskıı Aq úıdegi sátsiz kelissózderge qatysty túsinikteme bergenin jazǵan bolatynbyz.