Zelenskıı: Aýmaq máselesin ýkraın halqy sheshýi tıis

ASTANA. KAZINFORM — Ýkraına prezıdenti Vladımır Zelenskıı Kıevtiń AQSh-qa «beıbitshilik josparynyń» jańartylǵan nusqasyn jibergenin rastady, dep habarlaıdy BBC.

Vladımır Zelenskıı beısenbi kúni jýrnalıstermen áńgime barysynda Reseıge berilýi múmkin terrıtorııalyq aýmaqtar máselesin Ýkraına halqy sheshýi tıis dep aıtty.

— Men ýkraın halqy bul suraqqa jaýap beredi dep oılaımyn. Saılaý bolsyn, referendým bolsyn, ýkraın halqy óz ustanymyn bildirýi kerek, — dedi ol.

Zelenskıı sonymen qatar Kıevtiń AQSh-qa «beıbitshilik josparynyń» jańartylǵan nusqasyn jibergenin rastady. Ol AQSh eldiń shyǵysynda Reseı men Ýkraına áskerleri arasynda kelisimniń bóligi retinde demılıtarızatsııalanǵan «erkin ekonomıkalyq aımaq» qurýdy talap etetinin qosa aıtty.

— Olar ýkraın áskerleriniń Donetsk oblysynan ketip jatqanyn kórip otyr. Olar qazirdiń ózinde «erkin ekonomıkalyq aımaq» nemese «demılıtarızatsııalanǵan aımaq» dep ataıtyn bul aýmaqty kim basqaratynyn bilmeıdi, — dedi Ýkraına basshysy tilshilerge.

Eske sala keteıik, Amerıka Qurama Shtattary Reseı-Ýkraına qaqtyǵysyn sheshý boıynsha beıbitshilik josparyn shamamen úsh apta buryn usynǵan bolatyn.

Sondaı-aq, biz Tramptyń «Beıbitshilik jospary» 13 jeltoqsanda eýropalyq elderdiń qatysýymen Parıjde talqylanatynyn habarladyq.