Zelenskıı: AQSh, Ýkraına jáne Reseı arasyndaǵy kelissózder BAÁ-de ótedi

ASTANA. KAZINFORM — Ýkraına prezıdentiniń aıtýynsha, sarapshylar deńgeıindegi alǵashqy konsýltatsııalar jaqyn kúnderi ótýi múmkin. Bul týraly DW habarlady.

AQSh, Ýkraına jáne Reseı ókilderi Birikken Arab Ámirlikterinde (BAÁ) kelissózder ótkizýdi josparlap otyr. Bul týraly Ýkraına prezıdenti Vladımır Zelenskıı beısenbi, 22 qańtar kúni Davosta ótken Dúnıejúzilik ekonomıkalyq forým aıasynda AQSh prezıdenti Donald Tramppen kezdesýden keıin málimdedi.

Zelenskııdiń sózinshe, áńgime úshjaqty kelissózderdiń alǵashqy formaty týraly bolyp otyr. Bul kelissózder sarapshylar deńgeıinde juma jáne senbi kúnderi Abý-Dabıde ótýi múmkin. Buǵan deıin mundaı josparlar týraly Tramptyń arnaıy ókili Stıv Ýıtkoff ta habarlady.

Ýıtkoff aldymen Máskeýge baryp, Reseı prezıdenti Vladımır Pýtınmen kelissózder júrgizedi.

Zelenskıı: AQSh-tyń kútpegen bastamasy

Ýkraına basshysy úshjaqty konsýltatsııalar ótkizý bastamasynyń AQSh tarapynan kútpegen jaǵdaı bolǵanyn atap ótti. Sonymen qatar ol BAÁ bıligi josparlanyp otyrǵan kelissózder týraly habardar bolady dep úmit bildirdi.

Zelenskıı kezdesýden úlken úmit kútpeıtinin, alaıda Máskeýdiń ymyraǵa kelýge daıyn ekenin túsiný mańyzdy ekenin aıtty. Onyń sózinshe, Ýkraına men Reseı arasynda resmı tikeleı kelissózder birneshe aıdan beri ótkizilmegen. Buǵan deıin mundaı baılanystar úshin sońǵy alań Stambýl bolǵan.

Buǵan deıin biz Tramptyń Davosta Zelenskıımen ótken kezdesýdi «óte jaqsy» dep baǵalaǵany týraly jazdyq.